న్యూఢిల్లీ : ఢిల్లీ ప్రభుత్వం, లెఫ్టినెంట్ గవర్నర్ (ఎల్జీ) వినయ్ కుమార్ సక్సేనా మధ్య వివాదం ముదిరింది. ఆప్ ఎమ్మెల్యేలకు ఎల్జీ పంపిన పరువు నష్టం నోటీసులను ఆప్ నేత సంజయ్ సింగ్ చించివేశారు. ఎల్జీ సక్సేనాను తక్షణమే పదవి నుంచి తొలగించాలని ఆప్ ఎంపీ సంజయ్ సింగ్ డిమాండ్ చేశారు.
తాము లేవనెత్తిన ప్రశ్నలకు ఎల్జీ బదులివ్వకుండా తమను లీగల్ నోటీసులతో బెదిరిస్తున్నాడని ఆరోపించారు. ఈ లీగల్ నోటీసులకు తాను భయపడబోనని అంటూ సంజయ్ సింగ్ ప్రతులను ముక్కలుగా చించివేశారు.2.5 లక్షల మంది కళాకారుల సొమ్మును ఎల్జీ లూటీ చేశాడని ఆరోపించారు. ఆయన అవినీతిని తాము బట్టబయలు చేస్తే లీగల్ నోటీసులు ఇప్పించాడని అన్నారు. తాను ఇలాంటి పది లీగల్ నోటీసులను చించేస్తానని అన్నారు.
కళాకారుల సొమ్మును ఎక్కడ దాచాడో నిగ్గుతేల్చేందుకు ఎల్జీ సక్సేనాపై సీబీఐ, ఈడీలతో దర్యాప్తు జరిపించాలని కోరారు. కాగా తన ప్రతిష్టను దిగజార్చేలా వ్యాఖ్యలు చేశారని అతిషి, సౌరవ్ భరధ్వాజ్, దుర్గేష్ పాఠక్, సంజయ్ సింగ్, జాస్మిన్ షా సహా పలువురు ఆప్ నేతలకు ఎల్జీ సక్సేనా సోమవారం లీగల్ నోటీసులు పంపారు.