Isudan Gadhvi | త్వరలో జరుగనున్న గుజరాత్ అసెంబ్లీ ఎన్నికల్లో ఆమ్ ఆద్మీ పార్టీ (ఆప్) ముఖ్యమంత్రి అభ్యర్థి ఇసుదాన్ గాధ్వి ఖంభాలియా నియోజకవర్గం నుంచి బరిలో నిలువనున్నారు. ఈ విషయాన్ని ఆప్ అధినేత అరవింద్ కేజ్రీవాల్ ట్విట్టర్లో ఆదివారం వెల్లడించారు. ఈ నియోజకవర్గం నుంచి సిట్టింగ్ ఎమ్మెల్యే, కాంగ్రెస్ నేత అహిర్ విక్రమ్భాయ్ అర్జన్భాయ్ మేడమ్పై గాధ్వి పోటీకి దిగనున్నారు. కాగా, బీజేపీ ఇక్కడి నుంచి తమ అభ్యర్థిగా గుజరాత్ మాజీ మంత్రి ములుభాయ్ బేరాను పోటీకి దింపింది.
ఖంభాలియా నియోజకవర్గం నుంచి ఇసుదాస్ గాధ్వి ఎమ్మెల్యేగా పోటీ చేస్తారని అరవింద్ కేజ్రీవాల్ ట్విట్టర్లో ప్రకటన చేశారు. ‘రైతులు, నిరుద్యోగ యువత, మహిళలు, వ్యాపారవేత్తల కోసం ఏండ్ల తరబడి తన గళం వినిపించిన ఇసుదన్ గాధ్వి జామ్ ఖంభాలియా నుంచి పోటీ చేస్తారు. శ్రీకృష్ణుడి పవిత్ర భూమి నుంచి గుజరాత్ కొత్త, మంచి ముఖ్యమంత్రి వస్తున్నారు’ అని ట్విట్టర్లో రాశారు. అరవింద్ కేజ్రీవాల్ చేసిన ట్వీట్పై ఇసుదాన్ గాధ్వి స్పందించారు. మీరు భావిస్తున్నట్లుగానే గుజరాత్ ప్రజలకు సేవ చేస్తానని హామీ ఇస్తున్నట్లు చెప్పారు. ‘మీతోపాటు గుజరాత్ ప్రజలు నాపై ఉంచిన విశ్వాసం మేరకు చివరి శ్వాస వరకు గుజరాత్ ప్రజలకు సేవ చేస్తానని హామీ ఇస్తున్నాను. జై జై గర్వి గుజరాత్’ అని ఆప్ సీఎం అభ్యర్థి ట్విట్టర్లో రాశారు.
గుజరాత్లోని ద్వారకా జిల్లాలోని ఖంభాలియా సమీపంలోని పిపాల్య గ్రామంలో జన్మించిన ఇసుదాన్ గాధ్వి.. వ్యవసాయ నేపథ్యం ఉన్న కుటుంబం నుంచి వచ్చారు. జామ్నగర్లో గ్రాడ్యుయేషన్ పూర్తి చేసారు. అనంతరం జర్నలిజంలో వృత్తిని ఎంచుకుని అహ్మదాబాద్లో పనిచేవారు. 2021 జూన్లో గోపాల్ ఇటాలియా పిలుపుమేరకు ఇసుదాస్ గాధ్వి ఆప్లో చేరారు. గుజరాత్లోని ఓబీసీ వర్గానికి చెందిన ఇసుదాన్ గాధ్వి అహ్మదాబాద్లో అరవింద్ కేజ్రీవాల్ సమక్షంలో అధికారికంగా పార్టీలో చేరారు. ఈయనను ఆప్ సీఎం అభ్యర్థిగా కేజ్రీవాల్ వారం రోజుల క్రితం ప్రకటించారు.