AI | న్యూఢిల్లీ: కృత్రిమ మేధ(ఏఐ) కోసం త్వరలో యూపీఐ లాంటి ప్లాట్ఫామ్ రావొచ్చని కేంద్ర ఐటీ శాఖ మంత్రి అశ్విని వైష్ణవ్ సూచనప్రాయంగా తెలిపారు. బుధవారం ఢిల్లీలో ప్రారంభమైన గ్లోబల్ ఇండియా ఏఐ సదస్సు-2024ను ఉద్దేశించి ఆయన మాట్లాడారు. మరికొన్ని నెలల్లో భారత్ తన ఏఐ మిషన్ను వెల్లడిస్తుందన్నారు. ఏఐ శక్తి సామర్థ్యాలను వ్యవసాయం, విద్య, ఆరోగ్యం, ఔషధ రంగాల్లో విసృత్తంగా ఉపయోగించుకోవచ్చన్నారు. సాంకేతికత ప్రతి ఒక్కరికి అందుబాటులో ఉండే విధంగా ఉండాలన్నారు. ఏఐ దుర్వినియోగానికి, దాని వల్ల కలిగే ప్రమాదాలకు అడ్డుకట్ట వేయాల్సిన అవసరం ఉందన్నారు. ఇటీవల లోక్సభ ఎన్నికల్లో ఏఐ సాయంతో తప్పుడు సమాచార వ్యాప్తి జరిగిందని ఆయన ఆరోపించారు.
8 నుంచి మోదీ రష్యా పర్యటన
న్యూఢిల్లీ, జూలై 4: ప్రధాని నరేంద్ర మోదీ ఈ నెల 8, 9 తేదీలలో రష్యాలో పర్యటించనున్నారు. భారత్-రష్యా 22వ వార్షిక శిఖరాగ్ర సమావేశంలో పాల్గొనడంతో పాటు రెండు దేశాల మధ్య ఉన్న బహుముఖ సంబంధాల పరిధిని సమీక్షిస్తారు. రష్యా పర్యటన తర్వాత ఆయన ఆస్ట్రియాకు వెళతారు.
మధ్యాహ్న భోజనంలో పాము
సాంగ్లి: మహారాష్ట్రలోని సాంగ్లి జిల్లా, పాలుస్లో ఓ అంగన్వాడీ కేంద్రం సరఫరా చేసిన మధ్యాహ్న భోజన పొట్లంలో ఓ చిన్న పాము కనిపించింది. ఈ పొట్లాన్ని తీసుకున్న తల్లిదండ్రులు ఆ పాముతో కూడిన భోజనాన్ని ఫొటో తీసి, అంగన్వాడీ సేవికకు సోమవారం పంపించారు. ప్రభుత్వం దర్యాప్తునకు ఆదేశించింది.
ఎన్నో టాయిలెట్లు కడిగా
ఎన్విడియా సీఈవో
న్యూఢిల్లీ: అన్ని రకాల పనులనూ గౌరవించాలని, ఏ పనిని తక్కువ చేసి చూడకూడదని ప్రముఖ ఎలక్ట్రానిక్ చిప్ల తయారీ సంస్థ ఎన్విడియా సీఈవో జెన్సెన్ హువాంగ్ అభిప్రాయపడ్డారు. కెరీర్ తొలినాళ్లలో తాను ఎన్నో టాయిలెట్లు కడిగానని చెప్పారు. పని విలువపై ఈ ఏడాది మార్చిలో ఆయన మాట్లాడిన వీడియో ప్రస్తుతం వైరల్గా మారింది.