చంఢీగఢ్: హర్యానాలో ఇప్పుడు బీజేపీ ప్రభుత్వానికి మెజారిటీ లేనందున వెంటనే అసెంబ్లీలో విశ్వాస పరీక్ష నిర్వహించాలని జన నాయక్ జనతా పార్టీ (జేజేపీ) నేత, మాజీ డిప్యూటీ సీఎం దుష్యంత్ చౌతాలా డిమాండ్ చేశారు. ఈ మేరకు గవర్నర్ బండారు దత్తాత్రేయకు బుధవారం ఒక లేఖ రాశారు.
రాష్ట్రంలో రాష్ట్రపతి పాలన విధించాలని, గడువుకన్నా ముందే అసెంబ్లీ ఎన్నికలు నిర్వహించాలని కోరిన కాంగ్రెస్.. తమ ప్రతినిధి బృందం కలిసేందుకు సమయం ఇవ్వాలని గవర్నర్ను కోరారు. ఇప్పటికే ముగ్గురు స్వతంత్ర ఎమ్మెల్యేలు మద్దతు ఉపసంహరించుకోవడంతో సైనీ నేతృత్వంలోని బీజేపీ ప్రభుత్వం మైనారిటీలో పడింది. అయితే విపక్షాల డిమాండ్ను సీఎం నాయబ్ సింగ్ సైనీ తోసిపుచ్చుతూ తమకు సభలో మెజారిటీ ఉందని, మార్చిలోనే తమ ప్రభుత్వం బల పరీక్షలో నెగ్గిన విషయాన్ని గుర్తు చేశారు. అవసరమైతే తిరిగి విశ్వాస పరీక్షను ఎదుర్కోవడానికి సిద్ధమేనని ప్రకటించారు.