ముంబై: ముంబైలోని ఓ ఏరియా నుంచి నలుగురు వ్యక్తులు ట్యాక్సీ మాట్లాడుకుని ఛత్రపతి శివాజీ మహరాజ్ విమానాశ్రయానికి బయలుదేరారు. అక్కడి నుంచి విమానంలో వాళ్లు విదేశాలకు వెళ్లాల్సి ఉంది. కానీ వాళ్లు విమానాశ్రయానికి చేరుకోకముందే దారిదోపిడీ దొంగల బారినపడ్డారు. పోలీసులమని చెప్పి కొందరు దుండగులు ఆ నలుగురిని నిలువుదోపిడీ చేశారు.
ముంబైలోని వెస్టర్న్ ఎక్స్ప్రెస్ హైవేపై ఖేర్వాడి జంక్షన్ సమీపంలో మంగళవారం రాత్రి జరిగిన ఈ ఘటన ఆలస్యంగా వెలుగుచూసింది. వివరాల్లోకి వెళ్తే.. ట్యాక్సీ ఖేర్వాడి శివార్లలోకి రాగానే కొందరు దుండగుల గుంపు అడ్డగించింది. అనంతరం దుండగులు పోలీసులమని చెప్పి ట్యాక్సీలోని ప్రయాణికులను బెదిరించారు. వారి నుంచి పాస్పోర్ట్లను లాక్కొని కారు నుంచి దింపేశారు.
అనంతరం పోలీస్ వాహనమని చెప్పి మరో వాహనంలోకి బాధితులను ఎక్కించారు. తర్వాత వాహనాన్ని గోరేగావ్కు తీసుకెళ్లి ఆ నలుగురిని లూటీ చేశారు. వారి లగేజ్ను, నగదును, విలువైన వస్తువులను, మొబైల్ ఫోన్లను లాక్కుని పారిపోయారు. బాధితుల ఫిర్యాదు మేరకు కేసు నమోదు చేసిన పోలీసులు నిందితుల కోసం గాలింపు చేపట్టారు.