Gujarat | అహ్మదాబాద్, జూలై 11: గుజరాత్లో నకిలీలలు బయటపడుతూనే ఉన్నాయి. ఇప్పటికే రాష్ట్రంలో నకిలీ ప్రభుత్వ కార్యాలయం, నకిలీ టోల్ప్లాజాను గుర్తించగా తాజాగా నకిలీ దవాఖాన గుట్టు రట్టయ్యింది. అహ్మదాబాద్ జిల్లాలోని బవ్ల తాలుకాలో ఉన్న కేరళ గ్రామంలో అనన్య మల్టీ స్పెషాలిటీ పేరుతో ఒక దవాఖాన కొన్నాళ్లుగా నడుస్తున్నది.
ఇటీవల ఓ బాలిక ఇక్కడ చికిత్స పొందుతూ మరణించింది. అయితే, దవాఖానకు తెచ్చే వరకు బాలిక ఆరోగ్యం కాస్త స్థిమితంగానే ఉందని, దవాఖానకు వచ్చిన తర్వాతనే సరైన వైద్యం చేయనందుకు మరణించిందని ఆమె తల్లిదండ్రులు ఆరోపించారు. దీంతో వైద్య శాఖ అధికారులు దవాఖానకు వెళ్లగా నకిలీ బాగోతం బయటపడింది. దవాఖాన వేరే వైద్యుడి పేరు మీద రిజిస్టర్ కాగా మెహల్ చావ్డా అనే వైద్యరంగానికి సంబంధం లేని వ్యక్తి దవాఖానను నడిపిస్తున్నట్టు బయటపడింది. దీంతో దవాఖానను సీజ్ చేశారు.