(స్పెషల్ టాస్క్ బ్యూరో)హైదరాబాద్, అక్టోబర్ 28 (నమస్తే తెలంగాణ) : రాజస్థాన్ శాసన సభ ఎన్నికల వేళ కాంగ్రెస్ పార్టీకి ఎదురు దెబ్బలు తగులుతున్నాయి. ముఖ్యమంత్రి అశోక్ గెహ్లాట్ తమను పక్కన పడేశారని, కించపరచే రాజకీయాలు చేస్తున్నారని ఆరోపిస్తూ కొందరు నేతలు ఆ పార్టీని వీడుతున్నారు. సచిన్ పైలట్ వర్గానికి చెందిన జ్యోతి ఖండేల్వాల్ శనివారం ఆ పార్టీని వీడి, బీజేపీలో చేరారు. ఆమెతోపాటు కాంగ్రెస్ మాజీ ఎమ్మెల్యేలు చంద్రశేఖర్ బెయిద్, నందలాల్ పూనియా, మాజీ ఐపీఎస్ అధికారులు కేసర్ సింగ్ షెఖావత్, భీమ్ సింగ్, ఇతర నేతలు డా.హరిసింగ్ సారన్, ఝుంఝునూ, సావర్ లాల్ మహరియా కూడా బీజేపీ తీర్థం పుచ్చుకున్నారు. జ్యోతి మాట్లాడుతూ, నిజాయితీపరులను, కాంగ్రెస్ కోసం అంకితభావంతో పని చేసినవారిని ఆ పార్టీ హై కమాండ్ కూడా పట్టించుకోలేదన్నారు. యువ నేత సచిన్ పైలట్, సీఎం అశోక్ గెహ్లాట్ మధ్య విభేదాలు కొనసాగుతుండటం కాంగ్రెస్ విజయావకాశాలను దెబ్బతీస్తుందని విశ్లేషకులు చెప్తున్నారు.