Fever | (స్పెషల్ టాస్క్ బ్యూరో) హైదరాబాద్, జూలై 24 (నమస్తే తెలంగాణ): జ్వరం వస్తే శారీరకంగానే కాకుండా మానసికంగా కూడా అసౌకర్యంగా ఫీల్ అవుతాం. అయితే, తరచూ సుస్తి పడటం వల్ల శరీరంలో రోగనిరోధక శక్తిని పెంచుకోవడంతో పాటు భవిష్యత్తులో ఎదురయ్యే రోగాలను కూడా తప్పించుకోవచ్చని తెలుసా? ప్రపంచంలోని ప్రఖ్యాత ఆరు అధ్యయనాలు ఈ విషయాన్ని స్పష్టం చేస్తున్నాయి. తరచూ జ్వరం వస్తే కలిగే ఆరు లాభాలను వివరణలతో సహా వెల్లడించాయి.
జ్వరం వస్తే, శరీర ఉష్ణోగ్రత పెరుగుతుంది. దీంతో రోగ నిరోధక వ్యవస్థకు రక్షణగా ఉండే తెల్ల రక్త కణాలు అలైర్టెపోతాయి. వ్యాధిని కలిగించే బ్యాక్టీరియా, వైరస్ల కట్టడికి ఎముక మజ్జలో మరిన్ని తెల్ల రక్తకణాల ఉత్పత్తిని ప్రేరేపిస్తాయి. దీంతో రోగ నిరోధక శక్తి మరింత పెరుగుతుందని ‘ఇమ్యునాలజీ అండ్ సెల్ బయాలజీ’ జర్నల్లోని అధ్యయనం తెలిపింది.
మనం తీసుకొన్న ఆహారం, పీల్చే గాలి ద్వారా బ్యాక్టీరియా, వైరస్ల వంటి సూక్ష్మజీవులెన్నో శరీరం లోపలికి ప్రవేశిస్తాయి. ఇవి చైతన్యవంతంగా ఉండాలంటే శరీర ఉష్ణోగ్రత 37 డిగ్రీల సెంటీగ్రేడ్ (98.6 ఎఫ్) ఉండాలి. అయితే, సుస్తి చేసిన వ్యక్తికి శరీర ఉష్ణోగ్రత పెరుగుతుంది. దీంతో ఇన్ఫ్ల్యూయెంజా వైరస్ వంటి సూక్ష్మజీవుల సంతానాభివృద్ధి జరుగదు. ఈ మేరకు ‘వైరాలజీ’ జర్నల్లో ప్రచురితమైన అధ్యయనం వివరించింది.
శరీర ఉష్ణోగ్రతలో పెరుగుదల సూక్ష్మక్రిముల వృద్ధిని నిలుపుదల చేయడమే కాకుండా ఇమ్యూన్ సెల్స్ యాక్టివిటీని పెంచుతుంది. ఉష్ణోగ్రతలో పెరుగుదల నమోదవ్వగానే సైటోకైన్స్ ప్రొటీన్ ఉత్తేజితమవుతుంది. ఇది యాంటీవైరల్, యాంటీ బ్యాక్టీరియల్ అణువులను శరీరంలోకి విడుదల చేస్తుంది. దీంతో వ్యాధి తీవ్రత తగ్గుతుందని ‘క్లినికల్ ఇన్వెస్టిగేషన్’ జర్నల్ అధ్యయనం తెలిపింది.
జ్వరం కారణంగా శరీర ఉష్ణోగ్రత పెరుగడంతో హీట్ షాక్ ప్రొటీన్స్ చైతన్యవంతమవుతాయి. సూక్ష్మజీవుల దాడిలో నాశనమైన కణాలకు ప్రత్యేక ప్రొటీన్ సాయంతో ఇవి మరమ్మతులు చేస్తాయి. తద్వారా రోగనిరోధక శక్తిని ఉత్తేజితం చేస్తాయని ‘నేచర్ రివ్యూస్ మాలిక్యులార్ సెల్ బయాలజీ’ జర్నల్ అధ్యయనం తెలిపింది.
జ్వరం వల్ల శరీర ఉష్ణోగ్రత పెరిగినప్పుడు జీవక్రియ రేటు పెరుగుతుంది. అంటే, చెమట పోయడం, మల, మూత్ర విసర్జనలాంటివి జరుగుతాయి. శరీరంలో పేరుకుపోయిన టాక్సిక్ (విష) పదార్థాలను ఇది బయటకు పంపించడమే. ఇది శరీరానికి మంచిదని ‘టాక్సికాలజీ అండ్ ఎన్విరాన్మెంటల్ హెల్త్’ జర్నల్ అధ్యయనం పేర్కొన్నది.
తరచూ జ్వరంబారిన పడటంతో ఏ సూక్ష్మజీవి ఎలాంటి ప్రమాదాన్ని కలిగిస్తుంది? దాన్ని ఎలా ఎదుర్కోవాలన్న ట్రైనింగ్ రోగ నిరోధక వ్యవస్థకు తెలుస్తుంది. దీంతో ఆ వ్యాధులు మళ్లీ ఎదురైనా.. సులభంగా ఎదుర్కోగలదని ‘ఎక్స్పరమెంటల్ మెడిసిన్’ జర్నల్ అధ్యయనం తెలిపింది.