న్యూఢిల్లీ, జూలై 22: కన్వర్ యాత్ర మార్గంలోని హోటళ్లు వాటి యజమానుల పేర్లను ప్రదర్శించాలన్న యూపీ, ఉత్తరాఖండ్ ప్రభుత్వాల ఆదేశాలపై సుప్రీంకోర్టు సోమవారం మధ్యంతర స్టే విధించింది. ‘ఆహారాన్ని అమ్మేవాళ్లు వారు అమ్మే ఆహార వివరాలు ప్రదర్శించొచ్చు కానీ తమ యజమానులు, సిబ్బంది పేర్లు ప్రదర్శించాలని ఒత్తిడి చేయకూడదు’ అని కోర్టు తెలిపింది.
ఈ కేసు విచారణకు రాష్ట్ర ప్రభుత్వాల తరపున ఎవరూ హాజరు కాలేదు. హోటళ్ల యజమానుల పేర్లు ప్రదర్శించడం కొన్ని వర్గాల మధ్య వైరుధ్యాల్ని తీవ్రం చేస్తాయని తృణమూల్ కాంగ్రెస్ ఎంపీ మహువా మొయిత్రా, అసోసియేషన్ ఆఫ్ సివిల్ రైట్స్ సంస్థ సుప్రీంకోర్టులో పిటిషన్ వేశాయి. ఆహార భద్రత, ప్రమాణాల చట్టం-2006 ప్రకారం హోటళ్లు తమ యజమానుల పేర్లు ప్రదర్శించాల్సిన అవసరం లేదని పిటిషనర్ల తరపు న్యాయవాదులు కోర్టుకు తెలిపారు.