నేరేడుచర్ల, జూలై 22 : కృష్ణా నది యాజమాన్య కమిటీ సూచనల మేరకు నాగార్జునసాగర్ ఎడమ కాల్వ ద్వారా తాగు నీటి కోసం ఖమ్మం జిల్లా పాలేరుకు బందోబస్తు నడుమ నీటిని సరఫరా చేస్తున్నారు. సాగర్ ప్రాజెక్టు నుంచి కుడి కాల్వకు 5 టీఎంసీలు, ఎడమ కాల్వకు 4.5 టీఎంసీలు నీటి విడుదల చేయాలని కేఈఆర్ఎంబీ నిర్ణయించింది. ఈ మేరకు సాగర్ నుంచి పాలేరు వరకు నీటి సరఫరా అవుతుండగా తూముల ద్వారా రైతులు సాగు నీటి కోసం అక్రమంగా నీటిని తరలించకుండా ప్రతి తూము వద్ద గ్రామ కార్యదర్శులు, లస్కర్లు, రెవెన్యూ సిబ్బంది పహారా కాస్తున్నారు. ఈ మూడు శాఖల సిబ్బంది రెండు విడుతలుగా విధులు నిర్వహిస్తున్నారు. ఒక్కో సిబ్బంది 12 గంటల చొప్పున రాత్రి, పగలు విధులు నిర్వహించే విధంగా ఉన్నతాధికారులు ఏర్పాటు చేశారు.
గతంలో కూడా తాగునీటి అవసరాల సాకుతో ఇదే విధంగా పాలేరుకు నీటిని తరలించడం పట్ల ఎడమ కాల్వ దిగువ ప్రజలు ప్రభుత్వంపై అసంతృప్తి వ్యక్తం చేస్తున్నారు. హుజూర్నగర్ శాసన సభ్యుడు ఉత్తమ్కుమార్ రెడ్డి నీటి పారుదల శాఖ మంత్రిగా ఉండి కూడా ఈ ప్రాంతానికి తాగునీటి కోసం స్థానిక కాల్వల ద్వారా నీరు విడుదల చేయకపోవడం విచారకరం అని పలువురు విస్మయం వ్యక్తం చేశారు. ఇప్పటికైనా ఉన్నతాధికారులు, ప్రజా ప్రతినిధులు ఎడమ కాల్వ నుంచే కాకుండా మేజర్ కాల్వల నుంచి నీటిని తరలించి నీటి ఎద్దడిని నివారించాలని ప్రజలు కోరుతున్నారు. గ్రామ కార్యదర్శులు ప్రస్తుత వర్షాకాలంలో పారిశుధ్య పనులను పట్టించుకోకుండా ఎడమ కాల్వ తూముల వద్ద విధులు నిర్వహించాల్సి రావడంతో గ్రామాల్లో సమస్యలు వస్తున్నాయని, మౌలిక వసతులు కల్పించేవారు లేకుండా పోతున్నారని ప్రజలు ఆరోపిస్తున్నారు.