నందికొండ, జూన్ 15 : తమ పొదుపు ఖాతాలు, డిపాజిట్ల నుంచి సబ్ పోస్ట్మాస్టర్ కాజేసిన నగదును వెంటనే చెల్లించాలని డిమాండ్ చేస్తూ బాధితులు శనివారం పైలాన్ కాలనీలోని పోస్టాఫీసు ఎదుట ధర్నా చేపట్టారు. ఈ సందర్భంగా పలువురు బాధితులు మాట్లాడుతూ పైలాన్ కాలనీలోని పోస్టాఫీసులో తాము దాచుకున్న సుమారు రూ.1.5 కోట్ల రూపాయలను సబ్ పోస్ట్మాస్టర్ రామకృష్ణ కాజేసినట్లు తెలిపారు. విషయాన్ని డిసెంబర్లో గుర్తించి ఉన్నతాధికారుల దృష్టికి తీసుకెళ్లామని, స్థానిక విజయపురి టౌన్ పోలీస్ స్టేషన్లో ఫిర్యాదు చేశామని చెప్పారు.
విచారణ చేపట్టిన పోస్టల్, పోలీస్ అధికారులు ఖాతాదారుల డబ్బులను త్వరలో వారి ఖాతాల్లో జమ చేస్తామని చెప్పి ఆరు నెలలు దాటినా నేటికీ జమ చేయలేదని ఆవేదన వ్యక్తం చేశారు. ఈ విషయమై అడిగితే పోస్టల్ అధికారులు ఇష్టానుసారంగా మాట్లాడుతున్నారని ఆరోపించారు. విషయాన్ని జిల్లా ఎస్పీ దృష్టికి తీసుకెళ్లినా ఫలితం లేకుండా పోయిందని ఆవేదన వ్యక్తం చేశారు. డబ్బులు వస్తాయో రావోనని తీవ్ర మనోవేదనకు గురై ఓ ఖాతాదారుడు గుండా మల్లికార్జున గుండెపోటుతో మరణించాడని తెలిపారు.
ఈ విషయంలో నిర్లక్ష్యంగా వ్యవహరిస్తున్న పోస్టల్ అధికారులపై చర్యలు తీసుకొని తమ ఖాతాల్లో నగదు జమ చేయాలని డిమాండ్ చేశారు. ఆందోళనలో బాధితులు చిన్నయ్య, రవి, మధు, సంపూర్ణమ్మ, లక్ష్మి, చెన్నకేశవులు, సుబ్బారావు, శివ, సదాశివరెడ్డితోపాటు పలువురు ఖాతాదారులు పాల్గొన్నారు.