నల్లగొండ, జూలై 20 : రుణమాఫీ విషయం రైతులకు రెండు నిమిషాల్లో తెలియజేయాలని కలెక్టర్ నారాయణరెడ్డి వ్యవసాయ అధికారులను ఆదేశించారు. రుణమాఫీ సెల్ ఏర్పాటు చేశారా.. లేదా? అని తెలుసుకునేందుకు శనివారం జిల్లా వ్యవసాయ అధికారి కార్యాలయానికి ఆయన వచ్చారు. అయితే.. అక్కడ ఒక టేబుల్, ఏడీఏ, మరో ఏఓ మాత్రమే ఉండి రైతుల నుంచి వచ్చిన ఫిర్యాదులను రిజిష్టర్లో నమోదు చేసుకునే సెట్ ఏర్పాటు చేశారు. ఫిర్యాదులు రిజిష్టర్లో కాదు.. రెండు సెల్ నెంబర్లు ఇచ్చి జిల్లాలో వచ్చిన ప్రతి కాల్ లిఫ్ట్ చేసి వాటిని రెండు నిమిషాల్లోనే పరిష్కరించే విధంగా చర్యలు తీసుకోవాలని కలెక్టర్ ఆదేశించారు.
ఒక్క టేబుల్, ఇద్దరు అధికారులతో ఏం చేస్తారని ప్రశ్నించారు. కాల్స్ రిసీవ్ చేసుకొని వాటిని నమోదు చేసుకోవడానికి నలుగురు, పర్యవేక్షణ, యాప్లో ఎప్పటికప్పుడు వచ్చిన ఫిర్యాదులను పరిష్కరించేందుకు మరో నలుగురు ఉండాలని ఆదేశించారు. వెంటనే ఈ సెటప్ ఏర్పాటు చేయాలని ఏడీఏ హుస్సేన్బాబును ఆదేశించారు. కలెక్టర్ సూచనతో జేడీఏ మరో ఫిర్యాదు పరిష్కారానికి వెళ్లగా, ఆయనతో ఫోన్లో మాట్లాడి ఆదేశాలు జారీ చేశారు. రైతులు ఆఫీస్కు వచ్చినా.. ఫోన్ చేసినా వెంటనే స్పందించి రెండు నిమిషాల్లో రుణమాఫీ అవుతుందా.. లేదా.. దానికి గల కారణం తెలుపుతూ సమాధానం చెప్పాలని ఆదేశించారు. ప్రస్తుతం ఏర్పాటు చేసిన హెల్ప్లైన్ నెంబర్ 7288800023తోపాటు మరో నెంబర్ను ఏర్పాటు చేయాలని కలెక్టర్ ఆదేశించారు.
వ్యవసాయ శాఖలో అడ్మినిస్ట్రేటివ్ అధికారిగా పనిచేస్తున్న అబ్దుల్ మన్నన్ మూడు రోజులుగా అనుమతి తీసుకోకుండా ఆఫీస్కు రాకపోవడంతో శనివారం ఆకస్మిక తనిఖీ చేసిన కలెక్టర్ నారాయణరెడ్డి సస్పెండ్ చేశారు. విదేశాలకు వెళ్లే పనుల్లో ఉండి ఆఫీస్కు రాకుండా ఉన్న ఆయనపై సస్పెన్షన్ వేటు పడింది. రుణమాఫీ ప్రత్యేక సెల్ ఏర్పాట్లను పరిశీలించేందుకు వచ్చిన కలెక్టర్ రిజిష్టర్ను పరిశీలించగా.. ఈ విషయం తన దృష్టికి రావడంతో ఆయనను సస్పెండ్ చేస్తూ నిర్ణయం తీసుకున్నారు.