చౌటుప్పల్ రూరల్, జూలై 12 : చౌటుప్పల్ మండలం దండు మల్కాపురం గ్రామ పరిధిలోని శ్రీజయ ల్యాబోరేటరీస్ లిమిటెడ్ ప్రైవేట్ పరిశ్రమలో బుధవారం ఉదయం 11.45 నిమిషాలకు డై మిథైల్ సల్ఫైడ్ గ్యాస్ లీక్ కావడంతో పరిశ్రమలోని పలువురు కార్మికులు అస్వస్థతకు గురయ్యారు. పరిశ్రమ వర్గాలు సంఘటనను గుట్టుచప్పుడు కాకుండా కార్మికులను హైదరాబాద్లోని ఓ ప్రైవేట్ ఆస్పత్రికి తరలించారు. కొంత మందికి స్వల్ప అస్వస్థత ఉండగా చికిత్స నిర్వహించి డిశ్చార్చ్ చేశారు. ఐదుగురు కార్మికులు కంటి, తీవ్ర శ్వాస సంబంధ సమస్యతో ఐసీయూలో చికిత్స పొందుతున్నారు.
పరిశ్రమలో ప్రమాదం జరిగిందని అస్వస్థతకు గురైన కార్మికుడు నేలపట్ల రాంబాబు భార్య నేలపట్ల గౌతమి ఫిర్యాదు మేరకు చౌటుప్పల్ పోలీస్ స్టేషన్లో కేసు నమోదైంది. తన భర్త రాంబాబు బుధవారం ఉదయం ఆరు గంటలకు డ్యూటీకి వెళ్లగా తన భర్తతో పాటు మరికొందరు ఉద్యోగులు పరిశ్రమలో గ్యాస్ లీక్ కావడంతో శ్వాస సమస్యతో స్పృహ తప్పి పడిపోయారని, ఆ తర్వాత వారిని ఆస్పత్రికి తీసుకెళ్లారని ఫిర్యాదులో పేర్కొంది. చౌటుప్పల్ ఇన్స్పెక్టర్ అశోక్రెడ్డి కేసు దర్యాప్తు చేస్తున్నారు. ఈ ప్రమాదానికి సంబంధించి పూర్తి వివరాలు తెలియాల్సి ఉందని ఆయన చెప్పారు.