దామరచర్ల, జూలై 9 : మండలంలోని నర్సాపురం తండా జ్వరాలతో మంచం పట్టింది. ఇంటికి ఇద్దరు, ముగ్గురు చొప్పున జ్వరాల బారిన పడి ఇబ్బందులు పడుతున్నారు. పదిరోజులుగా గ్రామస్తులు జ్వరం, వంటి, కీళ్ల నొప్పులతో నడువలేని స్థితిలో ఇంటిపట్టునే ఉంటున్నారు. గతంలో ఇలాంటి పరిస్థితి రాలేదని, పనులకు పోకుండా జ్వరాలతోనే అవస్థలు పడుతున్నామని గ్రామస్తులు ఆందోళన చెందుతున్నారు. స్థానికంగా ఆర్ఎంపీ వైద్యులు వద్దకు వెళ్లి చికిత్స చేయించుకుంటున్నారు.
అసలే కరువు పరిస్థితి, అందులో ఇంటిలో అందరికీ జ్వరాలు రావడంతో ఆర్థికంగా ఇబ్బందులు పడుతున్నామని ఆవేదన వ్యక్తం చేస్తున్నారు. జ్వరాలు తగ్గినప్పటికీ కొందరికి కీళ్లనొప్పులతో ఇబ్బందులు పడుతున్నారు. గ్రామంలో మొత్తం 1,600 మంది జనాభా ఉంటే అందులో సగానికిపైగా జ్వరాల బారిన పడ్డారు.
డ్రైనేజీలు సక్రమంగా లేక పోవడంతో దోమలు విపరీతంగా పెరిగాయి. కనీసం దోమల నివారణకు ఫాగింగ్ కూడా జరుపడం లేదు. బ్లీచింగ్ పౌడర్ కూడా చల్లడం లేదని తండావాసులు ఆరోపిస్తున్నారు. మిషన్ భగీరథ నీరు రెండు మూడు రోజులకు ఒకసారి రావడంతో వాటినే నిల్వ చేసి తాగాల్సి వస్తున్నది.
గ్రామస్తులకు రక్త పరీక్షలు
జ్వరాల బారిన పడిన నర్సాపురం తండాలో గత మూడు రోజులుగా మెడికల్ క్యాంపు ఏర్పాటు చేస్తున్నట్లు వైద్యాధికారి నాగేశ్వర్రావు తెలిపారు. తండాలో జ్వరాలు అధికంగా ఉన్నాయని, పారిశుధ్యం లోపించడం వల్ల వైరల్ ఫీవర్స్ వస్తున్నాయని చెప్పారు. అందరికీ రక్త నమూనాలను తీసుకొని పరీక్షలు చేసి చికిత్స చేస్తున్నామని, జ్వరాలు అదుపులోకి వస్తున్నాయని తెలిపారు.
తండాలో డ్రైడే
నర్సాపురం తండాలో వైద్యసిబ్బంది మంగళవారం డ్రైడే పాటించారు. ఆశ వర్కర్లు, వైద్య సిబ్బందితో కలిసి ఇంటింటికీ తిరిగి నిల్వ ఉన్న నీటిని తొలగించారు. దోమల నివారణకు చర్యలు తీసుకోవాలని, జ్వరాలు రాకుండా తీసుకోవాల్సిన జాగ్రత్తల గురించి అవగాహన కల్పించారు.