నల్లగొండ రూరల్, డిసెంబర్ 26: తెలంగాణ సాయుధ పోరాట యోధురాలు కాసర్ల కమలమ్మ (95) నల్లగొండ మండలం బాదగూడెంలో ఆదివారం రాత్రి మృతి చెందారు. కమలమ్మ రంగారెడ్డి జిల్లా ఇబ్రహీంపట్నం ప్రాంతంలో తెలంగాణ సాయుధ రైతాంగ పోరాటంలో కీలక పాత్ర పోషించారు. అప్పటి నుంచి నేటి వరకు సీపీఎం పార్టీలో ఆమె కీలక పాత్ర పోషించారు.
సీపీఎం జిల్లా కార్యదర్శి ముదిరెడ్డి సుధాకర్రెడ్డి కమలమ్మ పార్థివ దేహానికి నివాళులర్పించి కుటుంబ సభ్యులకు సానుభూతి తెలిపారు. అనంతరం కమలమ్మ పార్థివ దేహాన్ని జిల్లా కేంద్రంలోని వైద్య కళాశాలకు అప్పజెప్పారు. ఈ సందర్భంగా ఐఎంఏ రాష్ట్ర నాయకుడు డాక్టర్ పుల్లారావు మాట్లాడుతూ సీపీఎం, ఎంవీఎన్ ట్రస్ట్ ఆధ్వర్యంలో వైద్య కళాశాలకు ఇప్పటికే నాలుగు పార్థివ దేహాలు అందించడం అభినందనీయమన్నారు. కార్యక్రమంలో సీపీఎం నాయకులు పాలడుగు నాగార్జున, సయ్యద్ హాషం, ఎండీ సలీం, ప్రభావతి, నర్సిరెడ్డి, సత్తయ్య, అరుణ ,పద్మ, నారాయణరెడ్డి, అరుణ, సరోజ, కమలమ్మ కుమార్తెలు ఎదుళ్ల విశాలంధ్ర ,నర్మద కుమారుడు కాసర్ల గౌతంరెడ్డి పాల్గొన్నారు.