వానకాలం ధాన్యం కొనుగోళ్లు పూర్తి కావడంతో రైతులు యాసంగి సాగులో నిమగ్నమయ్యారు. ఈ ఏడాది సమృద్ధిగా కురిసిన వర్షాలతో పుష్కలంగా నీరు ఉండటంతో పొలం పనుల్లో బిజీ అయ్యారు. సర్కారు సైతం పెట్టుబడి సాయం కింద రైతు బంధు డబ్బులు ఖాతాల్లో జమ చేస్తుండటంతో ఉత్సాహంగా పొలం పనులు చేస్తున్నారు. అధిక శాతం మంది రైతులు వరినాట్లు వేస్తున్నారు. ఇప్పటికే జిల్లాలో 1.09లక్షల ఎకరాల్లో సాగు పూర్తయ్యింది. వరితోపాటు జొన్న, పత్తి కూడా వేస్తున్నారు. పల్లెల్లో ఎటు చూసినా పచ్చని పొలాలు దర్శనమిస్తున్నాయి.
యాదాద్రి భువనగిరి, జనవరి 8 (నమస్తే తెలంగాణ) : యాసంగి సాగు పనులు ముమ్మరంగా సాగుతున్నాయి. వ్యవసాయ పనుల్లో రైతులు బిజీ అయ్యారు. ప్రభుత్వ ప్రోత్సాహకాలతో సాగు సంబురంగా సాగుతున్నది. ఈ సీజన్లో జిల్లా వ్యాప్తంగా 6.60లక్షల ఎకరాల్లో పంటలు సాగు కానున్నట్లు అధికారుల అంచనా. ఇందులో 2.20లక్షల ఎకరాల్లో వరి, 2.20 లక్షల ఎకరాల్లో పప్పులు, మరో 2.20 లక్షల ఎకరాల్లో నూనె పంటలు వేసే అవకాశమున్నట్లు లెక్కలు కట్టారు. ఈ సీజన్లో శుక్రవారం వరకు జిల్లాలో 1,09,349 ఎకరాలు సాగులోకి వచ్చాయి. ఇందులో 1,09,071 ఎకరాల్లో వరి, 91 ఎకరాల్లో జొన్నలు, 10 ఎకరాల్లో పత్తి, ఇతర పంటలు వేశారు. వానకాలం సీజన్లో మొత్తంగా 4,45,779 ఎకరాల్లో సాగు చేసిన విషయం తెలిసిందే.
సమృద్ధిగా నీళ్లు
రాష్ట్రంలో బీఆర్ఎస్ పార్టీ అధికారంలోకి వచ్చాక మిషన్ కాకతీయ కార్యక్రమాన్ని ప్రతిష్టాత్మకంగా తీసుకొచ్చింది. ఇందులో భాగంగా చెరువుల్లో పూడిక తీత, కట్ట మరమ్మతులు చేపట్టింది. దీంతో చెరువులు నీటితో నిండిపోయాయి. ఈ ఏడాది సమృద్ధిగా కురిసిన వర్షాలతో చెరువులు ఇప్పటికీ జలకళను సంతరించుకున్నాయి. జిల్లాలో చెరువులన్నీ నిండుకుండలా కనిపిస్తున్నాయి. రామన్నపేట మండలం తుమ్మలగూడెం, వలిగొండ మండంలోని బునాదిగాని చెరువు, వలిగొండ చెరువు, బీబీనగర్ మండలం మక్త్తఅనంతారం, బీబీనగర్ పెద్ద చెరువు, భువనగిరి పెద్ద చెరువు, తుర్కపల్లి మండలంలోని గంధమల్ల చెరువులు నీటితో కళకళలాడుతున్నాయి.
సాగుకు రైతుబంధు సాయం
రైతులకు ప్రతి సీజన్లో పెట్టుబడి సాయం అందిస్తున్న రాష్ట్ర సర్కారు.. ఈ సీజన్లో వ్యవసాయ పనులు షురూ కాగానే ప్రారంభించింది. గతంలో చిన్న, సన్నకారు రైతులు పెట్టుబడి కోసం ప్రైవేట్ వడ్డీ వ్యాపారులను ఆశ్రయించేది. తెచ్చిన అప్పులకు అసలు, వడ్డీలు కట్టలేక రైతులు ఆత్మహత్యలు చేసుకున్న ఘటనలు అనేకం. కానీ.. స్వరాష్ట్రంలో ఆ పరిస్థితి మారిపోయింది. సాగు సమయంలో రైతులు ఇబ్బందులు పడకుండా ప్రభుత్వమే పెట్టుబడి సాయం ఇస్తున్నది. సీజన్కు ఎకరానికి రూ.5వేల చొప్పున సంవత్సరానికి రూ.10వేలు అందిస్తున్నది. ఈ యాసంగి సీజన్లో 10వ విడుతలో ఇప్పటి వరకు 1,87,086 మంది రైతులకు 147,32,85,338 కోట్ల పెట్టుబడి సాయం చేసింది. రైతుబంధు డబ్బులు బ్యాంకు ఖాతాల్లో జమ కావడంతో రైతులు పనుల్లో బిజీబిజీ అయ్యారు. సర్కారు సాయం పట్ల సంతోషం వ్యక్తం చేస్తున్నారు.
వరి వైపు మొగ్గు..
జిల్లాలో 6.60లక్షల ఎకరాల్లో వివిధ పంటలు సాగు చేయనున్నట్లు అంచనా. యాసంగి సాగు పనులు ఊపందుకోగా.. ఇప్పటికే జిల్లాలో 1,09,349 ఎకరాల్లో పంటలు వేశారు. అధిక శాతం మంది రైతులు వరి వైపే మొగ్గు చూపుతున్నారు. మరో వారం రోజుల్లో నాట్లు మరింత ఊపందుకోనున్నాయి.
– రాధ, డీఏఓ, యాదాద్రి భువనగిరి జిల్లా
పెట్టుబడి ఖర్చులు తప్పినయి
నాకు వేములపల్లిలో ఒకటిన్నర ఎకరం పొలం ఉన్నది. సీఎం కేసీఆర్ సారు నాకు రైతుబంధు పథకం కింద ఒక కారుకు 7,500 రూపాయలు వేస్తున్నారు. దాంతో నాకు పంట సాగుకు పెట్టుబడి ఖర్చు తగ్గింది. ఇదివరకు పెట్టుబడి కోసం ఆడాఈడా అప్పులు తీసుకొచ్చే వాడిని. ఇప్పుడు కేసీఆర్ సారు రైతుబంధు పథకం ప్రవేశపెట్టడంతో నేరుగా నా బ్యాంక్ ఖాతాలో డబ్బులు జమ అవుతున్నాయి. అప్పులు తీసుకొచ్చే బాధ తప్పింది. రైతుబంధు డబ్బులతో పురుగుమందులు, యూరియా, విత్తనాలు కొంటా. రైతులకు మేలు చేసే కేసీఆర్ను మరువం.
– యాదగిరి, రైతు, వేములపల్లి
కేసీఆర్ వంటి నాయకుడిని చూడలేదు
నేను నాగార్జున సాగర్ ప్రాజెక్టు కట్టకముందు నుంచి వ్యవసాయం చేస్తున్న. ఇప్పటి వరకు కేసీఆర్ వంటి నాయకుడిని చూడలేదు. కేసీఆర్ రాకముందు రైతుల గురించి ఎవరూ పట్టించుకున్న పాపాన పోలేదు. గతంలో విత్తనాలు, ఎరువులు సరిగ్గా దొరికేవి కావు. విత్తనాల నుంచి ఎరువుల వరకు అన్నింటికీ సావుకారి కాడికే అప్పుకోసం పొయ్యేవాళ్లం. పంట పండిన తరువాత మళ్లీ సావుకారికే అమ్మేవాళ్లం. ఆయన చెప్పిందే రేటు.. ఇచ్చినప్పుడే డబ్బులు తీసుకునేవాళ్లం. కేసీఆర్ ముఖ్యమంత్రి అయినంక రైతుల కష్టాలు పోయినయ్. ఎకరానికి కారుకు రూ.5వేల చొప్పున పెట్టుబడికి డబ్బులు ఇస్తున్నరు. పండించిన పంటను కొంటున్నరు. మోటర్లుకు ఫ్రీ కరెంట్ ఇస్తున్నరు. నాకు, మా కుటుంబ సభ్యులకు కారుకు రూ.40 వేలు వస్తున్నయి. ఎనిమిదేండ్ల నుంచి భూమి శిస్తు కూడా లేదు. రైతును కేసీఆర్ రాజు చేసిండు. ఇలాంటి నాయకుడు ఎప్పటికీ ఉండాలి.
– ఎం.అబ్బయ్య, రైతు, పుల్లారెడ్డిగూడెం, అనుముల మండలం
ఇదివరకు అప్పు చేసి సాగు చేసేటోళ్లం
ఇదివరకు పంటలు వేసే ముందు చేతిలో డబ్బుల్లేక రైతులు చాలా ఇబ్బందులు పడేది. సావుకారి వద్ద అప్పు చేసి సాగు చేసేటోళ్లం. తెలంగాణ రాష్ట్రం వచ్చినంక సీఎం కేసీఆర్ రైతుబాంధవుడిగా మారి రైతుబంధు పైసలు ఇచ్చి రంది తీరుస్తుండు. పంటలు వేసే ముందే పెట్టుబడికి డబ్బులు చేతికందుతున్నాయి. ఇప్పుడు సావుకారి వద్ద అప్పులు చేసే తిప్పలు తప్పినయి. రైతుల గోస తీర్చుతున్న సీఎం కేసీఆర్కు ఎప్పటికీ రుణపడి ఉంటాం.
– కల్లూరి మల్లారెడ్డి, రైతు, నెమిల గ్రామం, రాజాపేట మండలం
హమాలీ పని మానేసి వ్యవసాయం చేస్తున్నా
నాకు మా ఊరిలో రెండెకరాల వ్యవసాయ భూమి ఉంది. గతంలో భూగర్భ జలాలు అంతంత మాత్రమే ఉండేవి. వ్యవసాయం చేస్తే ఏమీ మిగులుబాటు లేకుండె. పెట్టుబడికి తెచ్చిన వడ్డీలు తీర్చలేకపోయేది. దాంతో హైదరాబాద్ పెద్ద బస్టాండ్లో హమాలీ పనులకు వెళ్లేది. కేసీఆర్ సారు సీఎం అయ్యాక రైతుబంధు తెచ్చిండు. మిషన్ కాకతీయ కార్యక్రమం తెచ్చి చెరువులు తవ్వించిండు. కాలం మంచిగా అయితున్నది. నీటి ఊట పెరిగింది. ఇప్పుడు హమాలీ పని మానేసి ఊరిలోనే పంటలు పండించుకుంటూ గౌరవంగా బతుకుతున్నా. సీఎం కేసీఆర్ సారు ఇచ్చిన రైతుబంధు పెట్టుబడికి సరిపోతున్నది. అప్పలు తెస్తలేం. పంటకు కూడా మంచి ధర వస్తున్నది.
– నీల శేఖర్, రైతు, జైకేసారం (చౌటుప్పల్ రూరల్)
ఏ ప్రభుత్వమూ ఇట్ల సాయం చేయలే..
పంటలు సాగు చేసే రైతులకు పెట్టుబడి సాయాన్ని ప్రభుత్వమే అందించడం గొప్పవరం. ఇలాంటి ఆలోచనలు ఇప్పటి వరకు ఏ ప్రభుత్వమూ చేయలేదు. మాకున్న ఎకరంన్నర భూమిలో ఈ మధ్యే యాసంగి పనులు మొదలు పెట్టిన. ఇంతలోనే సీఎం కేసీఆర్ మాకు రైతు బంధు కింద పంట పెట్టుబడి సాయాన్ని జమ చేశారు. ఖాతాలో జమ అయిన వెంటనే విత్ డ్రా చేసుకొని తెచ్చుకున్నా. ముఖ్యమంత్రి కేసీఆర్కు రైతుల కష్టాలు తెలుసు. కాబట్టే సీజన్ రాగానే సాయం అందిస్తున్నారు.
– వెంకన్న, యువ రైతు, ఆకారం, శాలిగౌరారం
రైతుల కష్టం తెలిసిన నాయకుడు కేసీఆర్ సారు
తెలంగాణ ప్రభుత్వం ప్రతి సంవత్సరం వానకాలం, యాసంగి సీజన్లో రెండు దఫాలుగా పంట పెట్టుబడికి సాయం అందిస్తున్నది. ఇప్పటికే నాకున్న రెండు ఎకరాలకు బ్యాంకు ఖాతాలో 10వేల రూపాయలు జమ అయ్యాయి. ప్రభుత్వం రైతుల సంక్షేమం కోసం చేపట్టిన ఈ పథకం వరంగా మారింది. దండుగన్న వ్యవసాయాన్ని సీఎం కేసిఆర్ పండుగ చేశారు. గతంలో పెట్టుబడికి అప్పు తెచ్చేది. ఇప్పుడు ఆ పరిస్థితి లేదు. రైతుల కష్టం తెలిసిన నాయకుడు దేశంలో ఎవరైనా ఉన్నారంటే సీఎం కేసీఆర్ మాత్రమే.
– ఇటికాల శంకర్, రైతు పగిడిమర్రి (కనగల్)
రెండెకరాలకు రైతుబంధు వచ్చింది..
రైతుల సంక్షేమం కోరుకునే నాయకుడు సీఎం కేసీఆర్. రైతుబంధు, రైతుబీమా వంటి పథకాలు అమలు చేస్తున్నారు. వ్యవసాయానికి 24 గంటల కరెంటు ఇస్తున్నారు. గతంలో పెట్టుబడులకు అప్పులు చేయాల్సివచ్చేది. ప్రస్తుతం ఇస్తున్న సాయం మరువలేనిది. నా రెండెకరాలకు 10 వేల రూపాయలు నా ఖాతాలో పడ్డయి. ఏడాదికి రెండు సార్లు సాయం అందిస్తున్న సీఎం సారుకు రుణపడి ఉంటాం.
– దాచేపల్లి వెంకటనరసయ్య, రైతు, మేళ్లచెర్వు