నీలగిరి, జూలై 26 : అనేక వనరులతోపాటు హైదరాబాద్కు అతి సమీపంలో ఉన్న నల్లగొండను రాజకీయాలకు అతీతంగా అభివృద్ధి చేస్తానని రాష్ట్ర రోడ్లు భవనాల శాఖ మంత్రి కోమటిరెడ్డి వెంకట్రెడ్డి అన్నారు. ఒక ప్రణాళిక ప్రకారంగా రాష్ట్ర ప్రభుత్వం నుంచి నిధులు తీసుకువచ్చి రాష్ట్రంలో హైదరాబాద్ తర్వాత నల్లగొండే అనేలా చేస్తానన్నారు.
శుక్రవారం నల్లగొండ మున్సిపల్ సాధారణ సమావేశం చైర్మన్ బుర్రి శ్రీనివాస్రెడ్డి అధ్యక్షతన జరిగింది. ముఖ్య అతిధిగా హాజరైన మంత్రి మాట్లాడుతూ విలీన గ్రామాల కోసం ప్రత్యేక నిధులు సేకరించి అండర్గ్రౌండ్ డ్రైనేజీ, ఓఆర్ఆర్ ట్యాంకులు ఏర్పాటు చేస్తామన్నారు. 565 జాతీయ రహదారి నిర్మాణంతో తనకు సంబంధం లేదని, ఎన్హెచ్ఏఐ అధికారులే రూట్లు నిర్ణయించారని తెలిపారు.
అయినా బాధితులుకు మార్కెట్ రేటుకు అనుగుణంగా నష్టపరిహారం ఇప్పించేందుకు కృషి చేస్తానన్నారు. పట్టణంలో ప్రధానంగా తాగునీరు, పారిశుధ్యంపై ప్రత్యేక దృష్టి సారించాలని అధికారుకు సూచించారు. రాష్ట్రంలో ఎక్కడ లేనంత మంది పారిశుధ్య కార్మికులు నల్లగొండలో ఉన్నారని, వీధుల్లో ఎక్కడ చెత్త కనపడొద్దని సూచించారు. నిర్మాణాలకు అనుమతులు, అసోసియేట్ల పేరుతో కలెక్షన్లకు పాల్పడితే ఉపేక్షించేది లేదని, సక్కగ ఇంటికి పంపిస్తామని హెచ్చరించారు.
పానగల్ పర్యాటకానికి వచ్చిన నిధులు దారి మళ్లించవద్దు
బీఆర్ఎస్ కో ఆప్షన్ సభ్యుడు కొండూరు
నల్లగొండ పట్టణానికి ఆనుకున్న ఉన్న పానగల్ను పర్యాటక ప్రాంతంగా అభివృద్ధి చేసేందుకు కేసీఆర్ ప్రభుత్వం కేటాయించిన ఎస్డీఎఫ్ నిధులు రూ.130 కోట్లను దారి మళ్లిస్తూ తీర్మానం ప్రవేశపెట్టడాన్ని బీజేపీ, బీఆర్ఎస్ సభ్యులు వ్యతిరేకించారు. ఆ నిధులతో ఛాయా, పచ్చల సోమేశ్వరాలయాలను అభివృద్ది చేయాలని, అవసరమైతే ప్రత్యేక నిధులు తేవాలని మంత్రిని కోరారు.
పాతబస్తీ ప్రాంతంలో చాలా ఏండ్లుగా గ్రామ కంఠం భూముల్లో ఇండ్లు కట్టుకుని ఇంటి నెంబర్ తీసుకుని ఉంటున్న వారికి పట్టాలు ఇవ్వాలని బీఆర్ఎస్ ఫ్లోర్లీడర్ అభిమన్యు శ్రీనివాస్ కోరగా, కలెక్టర్తో చర్చించి సమస్యను పరిష్కరిస్తామని తెలిపారు.
రోడ్లు, భవనాల శాఖ మంత్రిగా ఉన్న కోమటిరెడ్డి ప్రాతినిధ్యం వహిస్తున్న నల్లగొండ పట్టణంలోని రోడ్ల దుస్థ్ధితిని వివరించే ఫొటోలతో బీజేపీ సభ్యులు పిల్లి రామరాజుయాదవ్, బండారు ప్రసాద్, గుర్రం జ్యోతి నిరసన తెలిపారు. సమావేశంలో కలెక్టర్ సి.నారాయణరెడ్డి, కమిషనర్ సయ్యద్ ముసాబ్ అహ్మద్, వైస్ చైర్మన్ అబ్బగోని రమేశ్గౌడ్, పబ్లిక్ హెల్త్ ఎస్ఈ కందుకూరి వెంకటేశ్వర్లు, ఈఈ రాములు, కౌన్సిలర్లు మారగోని గణేశ్, ఆలకుంట్ల రాజేశ్వరి, పర్వత్ ఫర్జానా, మాదగోని నవీన్గౌడ్ పాల్గొన్నారు.
సబ్స్టేషన్ నిర్మాణానికి శంకుస్థాపన
అంతకుముందు నల్లగొండ మండలంలోని దొనకల్ గ్రామంలో రూ.3కోట్లతో నిర్మించనున్న 33\11 కేవీ సబ్స్టేషన్ పనులకు మంత్రి శంకుస్థాపన చేశారు. ట్రాన్స్కో సీజీఎం ఎం.భిక్షపతి మాట్లాడుతూ రెండు, మూడు నెలల్లో దొనకల్ సబ్స్టేషన్ పనులు పూర్తి చేస్తామని హామీనిచ్చారు. అక్కడి నుంచి నల్లగొండ పట్టణ శివారులో నిర్మిస్తున్న మెడికల్ కళాశాల భవనానికి మంత్రి చేరుకుని పనులను పరిశీలించారు.
అధికారులతో సమీక్ష నిర్వహించి మిగిలి ఉన్న పనులపై ఆరా తీసి, వేగంగా పూర్తి చేయాలని అధికారులను ఆదేశించారు. ఆయన వెంట కలెక్టర్ సి.నారాయణరెడ్డి, ట్రాన్స్కో ఎస్ఈ చంద్రమోహన్, స్పెషల్ డిప్యూటీ కలెక్టర్ శ్రీదేవి, ఎంపీడీఓ వెంకట్రెడ్డి, తాసిల్దార్ శ్రీనివాస్, ఏఈ శ్రీనివాస్, నల్లగొండ మాజీ జడ్పీటీసీ వంగూరి లక్ష్మయ్య, కాంగెస్ నాయకులు గుమ్మల మోహన్రెడ్డి, ప్రకాశ్రెడ్డి, శ్రీనివాస్రెడ్డి ఉన్నారు.