చివ్వెంల/మోతె, జూలై 23 : విద్యార్థులకు మెరుగైన విద్యా బోధనతో పాటు నాణ్యమైన ఆహారం అందించాలని సూర్యాపేట కలెక్టర్ తేజస్ నందలాల్ పవార్ ఆదేశించారు. చివ్వెంల మండల కేంద్రంలోని జిల్లా పరిషత్ ఉన్నత పాఠశాలను మంగళవారం ఆయన ఆకస్మికంగా తనిఖీ చేశారు. విద్యార్థుల హాజరు, అల్పాహారాన్ని పరిశీలించారు. ఏ సబ్జెక్టుల్లో విద్యార్థులు వెనుకంజలో ఉన్నారో గుర్తించి వారిపై ప్రత్యేక శ్రద్ధ తీసుకోవాలని ఉపాధ్యాయులకు సూచించారు.
అనంతరం కలెక్టర్ మోతె పీహెచ్సీని తనిఖీ చేశారు. మెడికల్ రికార్డు, ఓపీ రిజిస్టర్ను పరిశీలించి సీజనల్ వ్యాధులు ప్రబలకుండా ముందు జాగ్రత్తలు తీసుకోవాలని వైద్య సిబ్బందికి సూచించారు. ఆ తర్వాత మోతె తాసీల్దార్ కార్యాలయానికి వెళ్లి రికార్డులను పరిశీలించారు. ధరణి పెండింగ్ ధరఖాస్తులను త్వరితగతిన దరఖాస్తులను పరిష్కరించాలని తెలిపారు.
ఎంపీడీఓ కార్యాలయంలో ప్రజాపాలన హెల్ప్ డెస్క్ని కలెక్టర్ పరిశీలించి గృహజ్యోతి, మహాలక్ష్మి పథకాల మార్పుల చేర్పులను ఎప్పటికప్పుడు నవీకరించాలని అధికారులకు సూచించారు. కలెక్టర్ వెంట మోతె తాసీల్దార్ సంఘమిత్ర, ఎంపీడీఓ హరిసింగ్ నాయక్, మెడికల్ అధికారి నాగరాజు, ఆర్ఐ మన్సూర్ అలీ, చివ్వెంల పాఠశాల ప్రధానోపాధ్యాయులు కళారాణి తదితరులు ఉన్నారు.