రామగిరి, జూలై 11 : దీర్ఘకాలంగా పెండింగ్లో ఉన్న విద్యార్థుల స్కాలర్ షిప్స్ విడుదల చేయాలని, సంక్షేమ హాస్టళ్ల విద్యార్థులకు తక్షణమే నోట్బుక్స్ అందజేయాలని విద్యార్థులు డిమాండ్ చేశారు. ఎస్ఎఫ్ఐ ఆధ్వర్యంలో గురువారం నల్లగొండ కలెక్టరేట్ ముట్డడి చేపట్టారు. ఈ సందర్భంగా వందలాదిగా తరలివచ్చిన విద్యార్థులు కలెక్టరేట్ వరకు భారీ ర్యాలీ నిర్వహించారు. ఈ సందర్భంగా ఎస్ఎఫ్ఐ నాయకులు మాట్లాడుతూ రాష్ట్ర వ్యాప్తంగా సాలర్షిప్స్, ఫీజు రీయింబర్స్మెంట్స్ రూ. 8000 కోట్లు బకాయి ఉండటం వల్ల ప్రైవేట్ కళాశాలలో చదువుకునే ఎస్సీ, ఎస్టీ, బీసీ, మైనారిటీ పేద మధ్యతరగతి విద్యార్థులు ఆర్థికంగా ఇబ్బంది పడుతున్నారన్నారు.
పేద, మధ్య తరగతి విద్యార్థుల చదువులు మధ్యలో ఆగిపోకుండా ఉండాలంటే సాలర్షిప్, ఫీజు రీయింబర్స్మెంట్ సకాలంలో అందించాలని కోరారు. పాఠశాలలు ప్రారంభమై నెల రోజులు కావస్తున్నా నల్లగొండ జిల్లాలో ఎస్సీ, ఎస్టీ, బీసీ, సంక్షేమ హాస్టళ్ల విద్యార్థులకు ఇప్పటివరకు పుస్తకాలు, యూనిఫాం, దుప్పట్లు ఇవ్వలేదన్నారు. సంక్షేమ హాస్టళ్లు, గురుకులాలు, కస్తూర్బా గాంధీ బాలికల పాఠశాలల్లో విద్యార్థులకు విద్యార్థులకు నాసిరకం బియ్యంతో భోజనం పెడుతున్నారని తెలిఆపరు.
అన్ని హాస్టళ్లలో నాణ్యమైన భోజనం అందించే విధంగా అధికారులను పర్యవేక్షించాలని డిమాండ్ చేశారు. ప్రభుత్వ పాఠశాలల్లో ఉపాధ్యాయులు సమయపాలన పాటించడం లేదని, గతంలో డీఈఓ దృష్టికి తీసుకెళ్లినా పట్టించుకోవడం లేదని చెప్పారు. ఈ కార్యక్రమంలో ఎస్ఎఫ్ఐ రాష్ట్ర, జిల్లా నాయకులు ఆకారపు నరేశ్, కుంచం కావ్య, సైదానాయక్, లక్ష్మణ్, ఖమ్మంపాటి శంకర్, బుడిగ వెంకటేశ్ పాల్గొన్నారు.
బొడ్రాయిబజార్ : పెండింగ్ స్కాలర్షిప్స్, ఫీజు రీయింబర్స్మెంట్ విడుదల చేయాలని సూర్యాపేట జిల్లా కేంద్రంలోనూ ఎస్ఎఫ్ఐ ఆధ్వర్యంలో విద్యార్థులు భారీ ర్యాలీ తీశారు. ప్రభుత్వ దిష్టిబొమ్మను దహనం చేశారు. ఈ సందర్భంగా ఎస్ఎఫ్ఐ రాష్ట్ర ఉపాధ్యక్షుడు ధనియాకుల శ్రీకాంత్వర్మ మాట్లాడుతూ పేద, మధ్య తరగతి విద్యార్థులకు ఉపకార వేతనాలు, మెస్ కాస్మోటిక్ చార్జీలు ఇవ్వకపోవడంతో తీవ్ర ఇబ్బందులకు గురవుతున్నారని ఆవేదన వ్యక్తం చేశారు.
విద్యార్థులు ఆందోళనలు చేసినప్పుడు టోకెన్లు జారీ చేయడం తప్ప ట్రెజరీలకు ఒక్క రూపాయి కూడా విడుదల చేయడం విమర్శించారు. ప్రభుత్వం విద్యార్ధి వ్యతిరేక విధానాలు వీడి అసెంబ్లీ సమావేశాల నాటికి సమస్యలను పరిష్కరించాలని, లేని పక్షంలో రాష్ట్ర వ్యాప్తంగా లక్షలాది మంది విద్యార్థులతో ఉద్యమిస్తామని హెచ్చరించారు. ఈ కార్యక్రమంలో జిల్లా కార్యదర్శి బానోతు వినోద్కుమార్, ఎస్ఎఫ్ఐ జిల్లా నాయకులు యాతాకుల ప్రవీణ్, వినయ్, రవి, గోపి, మధు, అరుణ్, అజయ్, భార్గవి, అరుణ, స్వప్న, గీతిక, స్పందన, సౌజన్య, గౌతమి పాల్గొన్నారు.