కాంగ్రెస్ ప్రభుత్వం అట్టహాసంగా తీసుకొచ్చిన గ్యాస్ పథకం గాయబ్ అయ్యింది. మహాలక్ష్మి పథకం కింద గ్యాస్ సబ్సిడీ మూణ్నాళ్ల ముచ్చటగా మారుతున్నది. జిల్లాలో 90శాతం మందికి బ్యాంక్ ఖాతాల్లో డబ్బులు జమ కావడం లేదు. దీంతో లబ్ధిదారులు ఆందోళన వ్యక్తం చేస్తున్నారు. మరోవైపు కేంద్రం ఇచ్చే సబ్సిడీ మాత్రం సకాలంలో అందుతున్నది.
యాదాద్రి భువనగిరి, జూలై 10 (నమస్తే తెలంగాణ) : అసెంబ్లీ ఎన్నికల ముందు కాంగ్రెస్ పార్టీ ఆరు గ్యారెంటీలను అమలు చేస్తామని హామీ ఇచ్చింది. ఇందులో భాగంగా మహాలక్ష్మి పథకాన్ని ప్రారంభించింది. దీనిలో రూ. 500కే సబ్సిడీ గ్యాస్ను తీసుకొచ్చింది. అయితే వినియోగదారులు ముందుగా పూర్తిగా డబ్బులు చెల్లించి గ్యాస్ సిలిండర్ బుక్ చేసుకోవాలి. ఆ తర్వాతే ఖాతాల్లో డబ్బులు జమ అవుతాయి. ప్రజాపాలనలో స్వీకరించిన దరఖాస్తుల ఆధారంగా గ్యాస్ సబ్సిడీకి లబ్ధిదారులను ఎంపిక చేశారు. జిల్లాలో ప్రజాపాలనలో గ్యాస్ సబ్సిడీ కోసం 2.30లక్షల దరఖాస్తులు వచ్చాయి. తెల్ల రేషన్ కార్డును ప్రామాణికంగా తీసుకున్నారు. కానీ జిల్లాలో ఎంత మంది లబ్ధిదారులు ఉన్నారో పౌర సరఫరా అధికారులకే తెలియకపోవడం గమనార్హం.
ప్రస్తుతం ఎల్పీజీ డొమెస్టిక్ ఎల్పీజీ సిలిండర్ ధర రూ. 855 ఉంది. ఇందులో రాష్ట్ర ప్రభుత్వం సుమారుగా రూ. 315, కేంద్రం రూ. 40.71 సబ్సిడీ ఇస్తున్నది. దాంతో లబ్ధిదారుడికి రూ. 500కే గ్యాస్ అందుతుంది. పథకం ప్రారంభమైన మొదట్లో సబ్సిడీ డబ్బులు ఖాతాల్లో సరిగ్గానే జమ అయ్యాయి. కానీ పార్లమెంట్ ఎన్నికల తర్వాత మాత్రం డబ్బులు జమ కావడంలేదని లబ్ధిదారులు చెబుతున్నారు. జిల్లాలో 90శాతం మందికి డబ్బులు పడటంలేదని, 10శాతం మందికే జమ అవుతున్నట్లు తెలుస్తున్నది. కొంత మంది నెల రోజులుగా డబ్బుల కోసం ఎదురు చూస్తున్నారు. కేంద్ర ప్రభుత్వం ఇచ్చే సబ్సిడీ మాత్రం ఎప్పటికప్పుడు జమ అవుతున్నది.
మహాలక్ష్మి పథకం కింద అర్హుల ఎంపిక కోసం ప్రభుత్వం ప్రజా పాలన కార్యక్రమంలో భాగంగా దరఖాస్తులు స్వీకరించింది. సబ్సిడీ సిలిండర్ కోసం భారీగా దరఖాస్తులు రాగా, వీటిని ఆన్లైన్ చేశారు. ఆ సమయంలో వివరాలు సరిగా ఎంటర్ చేయకపోవడం, గ్యాస్ కనెక్షన్, ఆధార్, బ్యాంక్ ఖాతా వివరాలు సరిగా ఇవ్వకపోవడంతో చాలా మంది ఈ పథకం కింద లబ్ధి పొందలేకపోయారు. దీన్ని గుర్తించిన సర్కారు వివరాలు సరిచేసుకునేందుకు ఎంపీడీఓ, మున్సిపల్ కార్యాలయాల్లో స్పెషల్ కౌంటర్లను ఏర్పాటు చేసింది. లబ్ధిదారులు సరైన ధ్రువ పత్రాలు అందించినా డబ్బులు జమ కావడంలేదు.
కాంగ్రెస్ అధికారంలోకి వచ్చిన కొత్తలో డిసెంబర్ 28న ప్రజాపాలన కార్యక్రమానికి శ్రీకారం చుట్టింది. జనవరి 6వరకు దరఖాస్తులను స్వీకరించారు. అప్పటి నుంచి ప్రజాపాలన వెబ్సైట్ను నిలిపేశారు. ప్రజాపాలన కార్యక్రమాన్ని ప్రతి నాలుగు నెలలకోసారి నిర్వహిస్తామని సర్కారు గతంలోనే ప్రకటించింది. కానీ ఇప్పటి వరకు మళ్లీ ప్రజాపాలన కార్యక్రమాన్ని ప్రారంభించలేదు. జూలై నెల గడుస్తున్నా ఆ ముచ్చటే ఎత్తడంలేదు.
కాంగ్రెస్ ప్రభుత్వం ఎంతో ఆర్భాటంగా 500కి గ్యాస్ సిలిండర్ ఇస్తామని ఆర్భాటంగా ప్రకటించి మోసం చేసింది. 500 కే సిలిండర్ వస్తుందని ఎంతో సంతోషపడ్డాం కానీ ఆ సంతోషం ఆవిరైపోయింది. సీఎం రేవంత్ రెడ్డి ఎకడ మీటింగ్ పెట్టినా 500 కే సిలిండర్ ఇస్తున్నామని గొప్పగా చెప్పుకుంటున్నారు. కానీ ఇప్పటివరకు అది అమలు కావడం లేదు. గ్యాస్ ఏజెన్సీకి పోతే 855 రూపాయలు తీసుకుంటున్నారు. బ్యాంకులో కేవలం 40 రూపాయలు మాత్రమే సబ్సిడీ పడుతున్నాయి. మాట ఇచ్చి ఈ ప్రభుత్వం మోసం చేసింది.
– మేకల మంజుల, గృహిణి మలాపురం
తక్కువకే గ్యాస్ ఇస్తామని కాంగ్రెస్ నాయకులు చెప్పిడంతో దరఖాస్తు చేసినం. రెండు సార్లు గ్యాస్ అయిపోతే పాత ధర కాడికే గ్యాస్ తెచ్చుకున్నా. అగ్గువకే గ్యాస్ ఇస్తమంటిరి గదనయ్యా అని గ్యాస్ బండోళ్లను అడిగితే డబ్బులు వాపసు నీ ఖాతాలో బ్యాంకులో జమైతయని చెప్పిర్రు. రెండు సార్ల గ్యాస్ నింపించుకున్నా డప్పులు రాలే. బ్యాంకోళ్లను అడిగితే ఇంకా రాలేదని గ్యాసోళ్లను అడగమని పంపించిర్రు. వాళ్లను అడిగితే సర్కారోళ్లు వేస్తలేరని చెప్పిండ్రు. ఎవరిని అడుగాలో సమజైతలేదు.
– మాడోతు అంబాలి, పుట్టెగూడెం, రాజాపేట మండలం
పార్లమెంట్ ఎన్నికల్లో ఓట్లు పడేందుకు కాంగ్రెస్ ప్రభుత్వం గ్యాస్ సబ్సిడీకి సంబంధించిన రెండు నెలల డబ్బులు జమ చేసింది. ఎన్నికల అనంతరం ఆ డబ్బులను వేయడం లేదు. ఇచ్చిన హామీలు నెరవేర్చకుండా కాలయాపన చేస్తూ కాంగ్రెస్ ప్రభుత్వం పాలన సాగిస్తున్నది. మహిళలకు గ్యాస్ బండ భారం లేకుండా చేస్తామని చెప్పిన కాంగ్రెస్ ప్రభుత్వం మహిళలను మోసం చేస్తున్నది.
-బొలగాని నాగమణి, గృహిణి, మోటకొండూర్
సబ్సిడీ గ్యాస్ కోసం ప్రజా పాలనలో దరఖాస్తు చేసుకున్నా ఇప్పటివరకు సబ్సిడీ పడలేదు. నెల రోజుల క్రితం కూడా ఎంపీడీఓ కార్యాలయంలో అప్డేట్ చేసుకున్నాం. అయినా సబ్సిడీ డబ్బులు బ్యాంకు ఖాతాలో పడలేదు. ముఖ్యమంత్రి రేవంత్రెడ్డి ఎన్నికల ముందు రూ. 500కే గ్యాస్ అందిస్తామని చెపితే ఎంతో మురిసిపోయాం. కానీ ప్రభుత్వం వచ్చి ఏడు నెలలు గడుస్తున్నా ఇచ్చిన మాట తప్పిండ్రు. నేటి వరకు సబ్సిడీ పడకపోవడంతో నిరాశతో ఉన్నాం.
– లోడి రోహిణి ఆత్మకూరు.ఎం