నీలగిరి, జూన్ 18 : జిల్లాలో గంజాయి, డ్రగ్స్తోపాటు ఇతర అక్రమ రవాణాను అరికట్టేందుకు కృషి చేస్తానని నల్లగొండ జిల్లా ఎస్పీ శరత్చంద్ర పవార్ అన్నారు. 2016 బ్యాచ్కు చెందిన శరత్చంద్ర పవార్ మంగళవారం ఎస్పీగా బాధ్యతలు స్వీకరించారు. ఇప్పటి వరకు ఇక్కడ ఎస్పీగా విధులు నిర్వహించిన చందనాదీప్తి సికింద్రాబాద్ రైల్వే ఎస్పీగా బదిలీ కావడంతో అమె స్థానంలో శరత్కుమార్ బదిలీపై వచ్చారు. బాధ్యతలు స్వీకరించిన అనంతరం ఆయన మాట్లాడుతూ జిల్లాలో శాంతిభద్రతల పరిరక్షణలతోపాటు నేరాలను నియంత్రించేందుకు కృషి చేస్తానన్నారు. ముఖ్యంగా గంజాయి, డ్రగ్స్తోపాటు ఇతర మత్తు పదార్థాలపై ఉక్కుపాదం మోపుతామని తెలిపారు.
గతంలో మహబూబాబాద్ జిల్లా ఎస్పీగా, సెంట్రల్ జోన్ డీసీపీగా, పోలీస్ అకాడమీ డిప్యూటీ డైరెక్టర్గా పనిచేసిన అనుభవంతో సీనియర్ అధికారుల సహకారాలతో ప్రజలకు శాంతిభద్రతలు కల్పిస్తానని చెప్పారు. మహిళలు, చిన్నారులపై జరిగే అఘాయిత్యాలను సహించేది లేదని, అలాంటి సంఘటనలు జరిగితే కఠిన చర్యలు తీసుకుంటామని హెచ్చరించారు. డయల్ 100కు వచ్చిన ప్రతి సమస్యపై స్పందించడంతోపాటు వాటి పరిష్కారానికి ప్రత్యేక దృష్టి సారించనున్నట్లు తెలిపారు. దొంగతనాలు, జీరో దందా వ్యాపారాలు చేసే వారిపై పీడీ యాక్టులు సైతం నమోదు చేస్తామన్నారు. ఎస్పీగా బాధ్యతలు స్వీకరించిన పవార్కు అదనపు ఎస్పీ రాములునాయక్, డీఎస్పీలు రమేశ్, శివరాంరెడ్డి, రాజశేఖర్ రాజు, గిరిబాబు, శ్రీనివాస్, సీఐలు, ఆర్ఐలు, ఎస్ఐలు, డీపీఓ సిబ్బంది పుష్పగుచ్ఛాలు అందజేసి స్వాగతం పలికారు.