యాదాద్రి భువనగిరి జిల్లాలోని ప్రతి పీహెచ్సీలో సీసీ కెమెరాలు ఏర్పాటు చేసి నిరంతరం నిఘా
కొనసాగేందుకు ప్రభుత్వం చర్యలు చేపట్టింది. గ్రామీణ ప్రాంత ప్రజలకు ఆరోగ్య సేవలందించే ప్రాథమిక ఆరోగ్య కేంద్రాలు పూర్తిగా నిఘా నీడలోకి వచ్చాయి. ఆరోగ్య కేంద్ర సిబ్బంది పనితీరు, వారు విధులకు
హాజరయ్యే సమయాలు, విధుల్లో అందిస్తున్న సేవలను రాష్ట్ర అధికారులు సీసీ కెమెరాల ద్వారా రోజూ నేరుగా పర్యవేక్షించనున్నారు. వీటిని హైదరాబాద్లోని సెంట్రల్ కమాండ్ కంట్రోల్కు అనుసంధానం చేశారు. ప్రతి పీహెచ్సీలో ప్రజలకు అందించే వైద్య సేవలను ప్రజలకు మరింత మెరుగ్గా అందించాలనే ఉద్దేశంతో ప్రభుత్వం ఈ కార్యక్రమాన్ని చేపట్టింది.
పీహెచ్సీల పనివేళల్లో వైద్యులు, ఇతర సిబ్బంది అందుబాటులో ఉండి తగిన సేవలందించేలా పీహెచ్సీల్లో మూడు సీసీ కెమెరాలు ఏర్పాటు చేశారు. ఒక్కో పీహెచ్సీలో ఔట్ పేషంట్లకు వైద్య సేవలందించే డాక్టర్ గది, ల్యాబ్ టెక్నీషియన్ రూమ్, ఫార్మాసిస్ట్ గదిలో ఒక్కో సీసీ కెమెరా ఏర్పాటు చేశారు. పీహెచ్సీలో డాక్టర్, ఫార్మాసిస్ట్, ల్యాబ్ టెక్నీషియన్ల పనితీరు, వారు విధుల్లో ఎంత సేపు ఉంటున్నారనేది పరిశీలించేందుకే వీటిని ఏర్పాటు చేశారు. ఈ కెమెరాలు నిరంతరం పనిచేసేలా పీహెచ్సీలకు ఇంటర్నెట్ సదుపాయం కల్పించారు.
హైదరాబాద్లోని ప్రజారోగ్య శాఖ డైరెక్టరేట్లోని కమాండ్ కంట్రోల్ వ్యవస్థకు అన్ని పీహెచ్సీల సీసీ కెమెరాలను అనుసంధానం చేశారు. ఏ పీహెచ్సీలో ఎవరు ఏం పని చేస్తున్నారనేది వైద్యారోగ్య శాఖ మంత్రితోపాటు ప్రజారోగ్యశాఖ ఉన్నతాధికారులు హైదరాబాద్లో తాము ఉన్న చోటు నుంచే పరిశీలించనున్నారు. డ్యూటీలో నిర్లక్ష్యం వహించే వారిని గుర్తించి తమ పనితీరు మార్చుకునేలా మార్గదర్శనం చేయనున్నారు. ప్రభుత్వ ఆస్పత్రుల్లోనూ ప్రైవేట్ ఆస్పత్రుల మాదిరిగా వైద్య సేవలందించేలా ప్రభుత్వం తీసుకుంటున్న చర్యల్లో భాగంగానే ఈ సీసీ కెమెరాలు ఏర్పాటు చేశారు. ప్రజలకు మెరుగైన వైద్య సేవలు అందించేందుకు ప్రభుత్వం పీహెచ్సీలను పటిష్టపరిచేలా చర్యలు తీసుకుంటుంది.
పనితీరు మెరుగు..
అన్ని పీహెచ్సీల్లో సీసీ కెమెరాలను ఏర్పాటు చేసి సరైన పర్యవేక్షణ చేస్తే సిబ్బంది పని తీరు మెరుగుపడటంతోపాటు బాధితులకు ఆశించిన మేర వైద్య సాయం అందే అవకాశాలుంటాయి. నిఘా కెమెరాల ద్వారా జిల్లా కేంద్రం నుంచే వైద్యులు, సిబ్బంది సమయపాలన పాటిస్తున్నారా? లేదా ? పీహెచ్సీకి వారు వచ్చే సమయాలను పరిశీలించడానికి వీలు కలుగుతుంది. దీంతోపాటు రోగుల తాకిడి ఎలా ఉంది? అనే అంశాన్ని పరిశీలించేందుకు వీలవుతుంది. నిఘా వ్యవస్థలో పని చేస్తున్నామని తెలిసి సిబ్బంది సైతం సక్రమంగా విధులు నిర్వహిస్తారు.
సేవలు మెరుగవుతాయి
గ్రామీణ పేదలకు నాణ్యమైన వైద్య సేవలు అందించాలనే ఉద్దేశంతో ప్రభుత్వం ప్రాథమిక ఆరోగ్య కేంద్రాల్లో సీసీ కెమెరాలు ఏర్పాటు చేసింది. ప్రతి పీహెచ్సీలో మూడింటిని బిగించారు. వీటిని డీఎంహెచ్ఓ కార్యాలయంతోపాటు హైదరాబాద్లోని ఉన్నతాధికారులకు అనుసంధానం చేశారు. దీంతో వైద్యులు, సిబ్బంది సక్రమంగా విధులకు హాజరవుతున్నారా? లేదా? అనేది తెలుస్తుంది. ఎవరైనా నిర్లక్ష్యంగా వ్యవహరిస్తే వారిపై శాఖాపరమైన చర్యలు తీసుకుంటాం.
-మల్లికార్జున్, డీఎంహెచ్ఓ, యాదాద్రి భువనగిరి
అన్ని పీహెచ్సీలలో కెమెరాలు..
యాదాద్రి భువనగిరి జిల్లాలోని 21 ప్రాథమిక ఆరోగ్య కేంద్రాలు ఉన్నాయి. ఉదయం 9 నుంచి సాయంత్రం 4 గంటల వరకు వైద్యులు రోగులకు సేవలు అందించాల్సి ఉంది. వైద్యులు, సిబ్బంది సమయపాలన పాటించేలా ప్రభుత్వం చర్యలకు శ్రీకారం చుట్టింది. జిల్లాలోని అన్ని పీహెచ్సీల్లో సీసీ కెమెరాలు ఏర్పాటు చేసినట్లు అధికారులు చెబుతున్నారు.