నీలగిరి, జూన్ 1 : తెలంగాణ రాష్ట్ర ఆవిర్భావ వేడుకలకు నల్లగొండ జిల్లా ముస్తాబైంది. ఉత్సవాలను జిల్లా వ్యాప్తంగా ఘనంగా నిర్వహించేందుకు అధికారులు అన్ని ఏర్పాట్లు చేశారు. ప్రభుత్వ కార్యాలయాలను విద్యుత్ దీపాలతో అలంకరించారు. జిల్లా కేంద్రంలోని క్లాక్టవర్ సెంటర్, కలెక్టర్ కార్యాలయం, మున్సిపల్ కార్యాలయాలు విద్యుత్ దీపాలతో ధగధగలాడుతున్నాయి.
పరేడ్ గ్రౌండ్లో వేడుకలు నిర్వహించేందుకు అన్నీ సిద్ధం చేశారు. ఆదివారం ఉదయం 8.45 నిమిషాలకు క్లాక్టవర్ సెంటర్లోని అమరవీరుల స్తూపం వద్ద కలెక్టర్ దాసరి హరిచందనతోపాటు ప్రజాప్రతినిధులు, అధికారులు నివాళులర్పించనున్నారు. అనంతరం అక్కడి నుంచి 9 గంటలకు పరేడ్ గ్రౌండ్ చేరుకొని జాతీయ జెండాను కలెక్టర్ ఆవిష్కరించనున్నారు. జిల్లా అభివృద్ధిపై ఆమె ప్రసంగించనున్నారు. పోలీస్ యంత్రాంగం అంతటా భారీ బందోబస్తు ఏర్పాటు చేసింది.
తెలంగాణ రాష్ట్ర దశాబ్ది ఉత్సవాలను బీఆర్ఎస్ ఆధ్వర్యంలో ఘనంగా నిర్వహించనున్నారు. ఈ మేరకు ఆదివారం వివిధ కార్యక్రమాలు చేపట్టనున్నారు. జిల్లాలోని ప్రభుత్వ ఆస్పత్రులు, అనాథ శరణాలయాలు, పలు సంస్థల్లో బీఆర్ఎస్ నేతలు, కార్యకర్తలు, పండ్లు, స్వీట్లు పంపిణీతోపాటు వివిధ సేవా కార్యక్రమాలను చేపట్టనున్నారు.