సూర్యాపేట, జూలై 22 (నమస్తే తెలంగాణ) : బీఆర్ఎస్ వర్కింగ్ ప్రెసిడెంట్, రాష్ట్ర పురపాలక, ఐటీ శాఖల మంత్రివర్యులు కేటీఆర్ జన్మదిన వేడుకలను సోమవారం ఘనంగా నిర్వహించాలని బీఆర్ఎస్ సూర్యాపేట, నల్లగొండ జిల్లాల అధ్యక్షులు బడుగుల లింగయ్యయాదవ్, రమావత్ రవీంద్రనాయక్ పిలుపునిచ్చారు. ఢిల్లీలో ఉన్న ఎంపీ బడుగుల లింగయ్యయాదవ్ ‘నమస్తే తెలంగాణ’తో ఫోన్లో మాట్లాడగా, దేవరకొండలోని క్యాంపు కార్యాలయంలో రమావత్ రవీంద్రకుమార్ మాట్లాడారు. మంత్రిగా కేటీఆర్ ఐటీలో తెలంగాణను దేశానికే మేటిగా తీర్చిదిద్ది తెలంగాణకు ఘనకీర్తిని తెచ్చిపెడుతూనే హైదరాబాద్తోపాటు రాష్టంలోని కార్పొరేషన్లు, మున్సిపాలిటీలను ఎంతో అభివృద్ధి చేస్తున్నారన్నారు.
మరో వైపు బీఆర్ఎస్ వర్కింగ్ ప్రెసిడెంట్గా కేటీఆర్ పార్టీని విజయవంతంగా నడిపిస్తూ రాబోయే ఎన్నికల్లో వందకు పైనే సీట్లు గెలిచేలా ప్రణాళికలు రూపొందించి పార్టీ శ్రేణులకు దిశా నిర్దేశం చేస్తున్నట్లు చెప్పారు. కేటీఆర్ పుట్టిన రోజు వేడుకలను ప్రజాప్రతినిధులు, బీఆర్ఎస్ శ్రేణులు గ్రామ, మండల, నియోజకవర్గ, జిల్లా కేంద్రాల్లో ఘనంగా నిర్వహించాలని పిలుపునిచ్చారు. కేకులు కట్ చేసి స్వీట్ల పంపిణీతోపాటు అన్నదానాలు, రోగులకు పండ్ల పంపిణీ చేపట్టాలని సూచించారు. ప్రజాప్రతినిధులు, పార్టీ శ్రేణులు భారీగా పాల్గొనాలని పిలుపునిచ్చారు.