నీలగిరి/మునుగోడు /బొడ్రాయిబజార్, మే 30 : నల్లగొండ, సూర్యాపేట జిల్లాల్లో ప్రథమ చికిత్స కేంద్రాల పేరుతో నిబంధనలకు విరుద్ధంగా నిర్వహిస్తున్న పలు ఆస్పత్రులపై బుధవారం రాష్ట్ర మెడికల్ కౌన్సిల్ సభ్యులు తనిఖీలు నిర్వహించారు. ప్రథమ చికిత్స కేంద్రం అని పెట్టి రోగులను అడ్మిట్ చేసుకోవడం, స్లైన్లు ఎక్కించడం, అబార్షన్లు, ఆపరేషన్లు తదితర శస్త్ర చికిత్సలు చేస్తున్న 51 ఆస్పత్రుల్లో తొమ్మిది బృందాలుగా ఏర్పడి తనిఖీలు చేసి 55 మందిపై కేసులు నమోదు చేశారు.
నల్లగొండ జిల్లా కేంద్రంలో 25, సూర్యాపేటలో 10, చండూర్లో 5, మునుగోడులో 6, తిప్పర్తిలో 5 చోట్ల తనిఖీలు నిర్వహించారు. ఆస్పత్రుల్లో వాడుతున్న మందులను గుర్తించారు. యాంటీబయాటిక్స్, స్టెరాయిడ్స్, ఇంజక్షన్స్, గర్భ విచ్చిత్తి మాత్రలు, పరికరాలు, ఆపరేషన్ థియేటర్లు, కాలం చెల్లిన, అమ్మకానికి వీలు లేని మందులను రోగులకు అందిస్తున్నట్లు గుర్తించారు. అక్కడున్న రోగులతో మాట్లాడి ఏ సమస్యతో వచ్చారు, ఎప్పటి నుంచి ఆస్పత్రిలో చేరారనే వివరాలను వీడియో రూపంలో తీసుకుని పోలీసులకు అప్పగించారు.