సూర్యాపేట అర్బన్, జూలై 16 : రాష్ట్రంలో డ్రగ్స్ సరఫరాను అరికట్టేందుకు ప్రభుత్వం చర్యలు ప్రారంభించింది. పాఠశాలల్లో విద్యార్థులు డ్రగ్స్ బారిన పడకుండా కట్టుదిట్టమైన చర్యలకు ఉపక్రమించింది. ఇందుకోసం ప్రభుత్వ, ప్రైవేట్ హైస్కూల్స్లో ప్రహరీ క్లబ్లను ఏర్పాటు చేయాలని నిర్ణయం తీసుకుంది. దీనికి సంబంధించి విద్యాశాఖ ప్రధాన కార్యదర్శి అన్ని జిల్లాల విద్యాశాఖ అధికారులకు ఆదేశాలు చేశారు. మాదక ద్రవ్యాల దుర్వినియోగం నుంచి పిల్లలను ప్రహరీ క్లబ్లు కాపాడనున్నాయి. ప్రతి కమిటీలో ఆరుగురు సభ్యులను వివిధ స్థాయిలో ఉన్న వారిని నియమించనున్నారు. సూర్యాపేట జిల్లాలో ఏడు వందలకుపైగా హైస్కూళ్లు ఉన్నాయి.
ప్రహరీ క్లబ్ సభ్యులు
పాఠశాలల్లో ప్రహరీ క్లబ్ అధ్యక్షులుగా హెడ్ మాస్టర్ లేదా ప్రిన్సిపాల్ను ఎన్నుకుంటారు. వైస్ ప్రెసిడెంట్గా సీనియర్ టీచర్ లేదా ప్రెండ్లీ టీచర్ను నియమిస్తారు. 6 నుంచి 10వ తరగతి వరకు ప్రతి తరగతిలోని ఇద్దరు విద్యార్థులు, స్థానికంగా ఉంటే పోలీస్ స్టేషన్ నుంచి ఒక అధికారి, పేరెంట్స్ నుంచి ఒకరు ప్రహరీ క్లబ్లో సభ్యులుగా ఉంటారు.
త్వరలో మార్గదర్శకాలు
ప్రభుత్వం డ్రగ్స్ నియంత్రణ కోసం ఏర్పాటు చేస్తున్న ప్రహరీ క్లబ్లకు సంబంధించిన పూర్తి మార్గదర్శకాలను ప్రభుత్వం త్వరలో విడుదల చేయనున్నది. ఇప్పటికే ప్రభుత్వ, ప్రైవేట్ పాఠశాలలు ప్రారంభమైన నేపథ్యంలో కమిటీల ఏర్పాటు పూర్తయ్యేలోపు ప్రభుత్వం సూచించే మార్గదర్శకాలను అమలు చేసేందుకు సిద్ధం కానున్నారు.
కమిటీల లక్ష్యం
పిల్లలు మత్తు పదార్థాలుగా ఉపయోగించే ఔషధ మందులు, పదార్థాలు, ఇతర రకాల వస్తువులు చేరకుండా నిరోధించడానికి ఈ ప్రహరీ క్లబ్లు పనచేయనున్నాయి. ఇప్పటికే డ్రగ్స్ మాఫియాపై ఉక్కుపాదంతో అణగదొక్కుతున్న ప్రభుత్వం పాఠశాలల్లో ఏర్పాటు చేసే ప్రహరీ క్లబ్ల సహకారంతో పోలీస్ అధికారులు మరిన్ని దాడులు నిర్వహించనున్నాయి. రానున్న రోజుల్లో డ్రగ్స్, మాదకద్రవ్యాల జిల్లాగా మార్చేందుకు సహకారం
అందించనున్నాయి.
కమిటీల కోసం ఆదేశాలు వచ్చాయి
కమిటీలకు సంబంధించి విద్యాశాఖ కార్యాలయానికి ఆదేశాలు వచ్చాయి. జిల్లాలోని అన్ని మండలాధికారులకు సమాచారం అందించాం. ప్రభుత్వ ఆదేశాల మేరకు కమిటీలను ఏర్పాటు చేసి అమలు చేస్తాం. స్థానికంగా ఉన్న పోలీసు అధికారులతో సమావేశం ఏర్పాటు చేసి కమిటీల్లో వారి సూచనలు తీసుకుంటాం.
-అశోక్, జిల్లా విద్యాశాఖ అధికారి, సూర్యాపేట
డ్రగ్స్ రహిత జిల్లాగా మారాలి
పాఠశాల, కళాశాలల్లో విద్యార్థులకు అవగాహన లేక డ్రగ్స్ బారిన పడి వాటికి బానిసలవుతున్నారు. డ్రగ్స్ నియంత్రణకు కమిటీలను ఏర్పాటు చేసి పకడ్బందీగా అమలు చేయాలి. ఇందులో తల్లిదండ్రులను భాగస్వాములను చేసి వారి సలహాలు, సూచనలు తీసుకోవడం మంచి పరిణామం. ఈ కమిటీల ద్వారా డ్రగ్స్ రహిత జిల్లాగా మారేందుకు అవకాశం ఉంటుంది.
-కె. ధనుంజయ చారి, పేరేంట్, సూర్యాపేట