నందికొండ, జూలై 24 : ప్రజా ఫిర్యాదులో జాప్యం చేయకుండా తక్షణమే స్పందిస్తూ బాధితులకు తగిన న్యాయం జరిగేలా పోలీసులు పని చేయాలని నల్లగొండ ఎస్పీ శరత్చంద్ర పవార్ అన్నారు. నందికొండ హిల్కాలనీ విజయపురి టౌన్ పోలీస్ స్టేషన్లో బుధవారం నిర్వహించిన మీట్ యువర్ ఎస్పీ కార్యక్రమంలో ఆయన పాల్గొన్నారు. రూ.1.50 కోట్లు నష్టపోయిన పోస్టల్ బాధితులు, ఫ్యామిలీ గొడవలు, ల్యాండ్ సమస్యలు, ఫారెస్ట్ భూములు తమకు కేటాయించాలని, తిరుమలగిరి (సాగర్ ) మండల పరిధిలోని చింతలపాలెం, నెల్లికల్, తునికనూతల పరిధిలోని 20 గ్రామాలను నాగార్జునసాగర్ పోలీస్ స్టేషన్లో కలుపాలని వచ్చిన ఫిర్యాదులను ఎస్పీ పరిశీలించారు.
సంబంధిత శాఖ అధికారులకు సత్వరమే న్యాయం చేసేలా చర్యలు తీసుకోవాలని ఆదేశించారు. ఈ సందర్భంగా ఆయన మాట్లాడుతూ ప్రజలకు ఎప్పుడూ అందుబాటులో ఉంటూ వెంటనే సమస్యలను పరిష్కరించాలని, దొంగతనాలు జరుగకుండా సీసీ కెమెరాల ఏర్పాటుతో పాటు పెట్రోలింగ్ నిర్వహించాలన్నారు. నాగార్జునసాగర్ రెండు తెలుగు రాష్ర్టాలకు సరిహద్దు కావడంతో అనునిత్యం నిఘా ఏర్పాటు చేసి తనిఖీలను నిర్వహిచాలని, గంజాయి రవాణా అరికట్టడానికి సమర్థంతంగా పని చేయాలని తెలిపారు.
మారుమూల గ్రామాల ప్రజలు జిల్లా కేంద్రానికి రాలేక పోతున్నారని, ప్రజల వద్దకు వెళ్లి వారి సమస్యలను పరిష్కరించడానికి మీట్ యువర్ ఎస్పీ కార్యక్రమం నిర్వహిస్తున్నామని చెప్పారు. అనంతరం హిల్కాలనీ రెడ్డి ఫంక్షన్ హాల్లో మత్తు పదార్థాల వినియోగం వల్ల కలిగే నష్టాలపై యువతకు మ అవగాహన కార్యక్రమాన్ని నిర్వహించారు. అంతకు ముందు నాగార్జునసాగర్ సర్కిల్ పోలీస్ స్టేషన్లో సిబ్బంది పనితీరు, పోలీస్ స్టేషన్ స్థితి గతులను ఎస్పీ పరిశీలించారు. ఈ కార్యక్రమంలో మిర్యాలగూడ డీఎస్పీ రాజశేఖర్రాజు, సీఐ బీసన్న, ఎస్ఐ సంపత్గౌడ్ పాల్గొన్నారు.