దేవరకొండ, ఫిబ్రవరి 18 : నియోజకవర్గంలోని 25 గిరిజన గ్రామ పంచాయతీల భవనాల మంజూరుకు రూ.5 కోట్ల నిధులు మంజూరైనట్లు ఎమ్మెల్యే రమావత్ రవీంద్రకుమార్ తెలిపారు. శనివారం పట్టణంలోని తన క్యాంపు కార్యాలయంలో విలేకరులతో మాట్లాడారు. కొత్తగా ఏర్పాటైన గ్రామపంచాయతీల భవనాల నిర్మాణానికి ప్రభుత్వానికి ప్రతిపాదనలు పంపగా నిధులు మంజూరు చేస్తూ గిరిజన శాఖ నుంచి ఉత్తర్వులు అందాయన్నారు. ఒక్కో భవనానికి రూ.20 లక్షల చొప్పున మంజూరు చేసినట్లు చెప్పారు. నిధులు మంజూరు చేసిన గిరిజన సంక్షేమశాఖ మంత్రి సత్యవతీరాథోడ్, జిల్లా మంత్రి జగదీశ్వర్రెడ్డికి ధన్యవాదాలు తెలిపారు.
సీఎం సహాయనిధి చెక్కు పంపిణీ
డిండి, చింతపల్లి మండల కేంద్రాలకు చెందిన ఇద్దరికి సీఎం సహాయనిధి నుంచి మంజూరైన చెక్కులను ఎమ్మెల్యే రవీంద్రకుమార్ పంపిణీ చేశారు. కార్యక్రమంలో జడ్పీటీసీ మారుపాకుల అరుణాసురేశ్గౌడ్, బీఆర్ఎస్ మండలాధ్యక్షుడు టీవీఎన్ రెడ్డి, నాయకులు మునుకుంట్ల వెంకట్రెడ్డి, బొడ్డుపల్లి కృష్ణ, వడ్త బాలు, ఇలియాస్ పటేల్, సర్పంచులు అంజయ్య, ఆంజనేయులు పాల్గొన్నారు.