గ్రామాలను అన్ని రంగాల్లో తీర్చిదిద్ది పూర్తిస్థాయిలో అభివృద్ధి చేయాలనే ఉద్దేశంతో కేసీఆర్ ప్రభుత్వం పల్లె ప్రగతి పథకాన్ని ప్రవేశపెట్టింది. పారిశుధ్యం నుంచి వైకుంఠధామాల వరకు అన్ని సౌకర్యాలు కల్పించేందుకు ఈ కార్యక్రమం చేపట్టింది. అభివృద్ధి పనులకు మాజీ సర్పంచులు రూ.లక్షలు వెచ్చించారు. కానీ వాటి బిల్లులను వారి పదవీ కాలం ముగిసినా ప్రభుత్వం విడుదల చేయకపోవడంతో ఆర్థికంగా ఇబ్బంది పడుతున్నారు. అప్పులు తెచ్చి అభివృద్ధి పనులు చేస్తే ప్రభుత్వం బిల్లులు ఇవ్వకపోవడం వల్ల వడ్డీలు కట్టలేక పోతున్నామని ఆవేదన వ్యక్తం చేస్తున్నారు. ఉమ్మడి నల్లగొండ వ్యాప్తంగా మాజీ సర్పంచులు సుమారు రూ.130 కోట్లు వెచ్చించి పనులు చేయగా ఆ బిల్లులు ప్రభుత్వ నుంచి రావాల్సి ఉన్నది.
పల్లెలను పూర్తిస్థాయిలో అభివృద్ధి చేయాలనే ఉద్దేశంతో రాష్ట్ర ప్రభుత్వం 2019 సెప్టెంబర్ నుంచి పల్లె ప్రగతిని అమల్లోకి తీసుకొచ్చింది. ఈ పథకం ద్వారా గ్రామంలో అన్ని సౌకర్యాలను కల్పించే దిశగా చర్యలు చేపట్టింది. ఇందుకోసం ఉమ్మడి నల్లగొండ జిల్లాలోని 1,740 గ్రామ పంచాయతీలకు రూ.46.50 కోట్లు ప్రతి నెలా విడుదల చేసింది. మొత్తంగా 51 నెలలపాటు ఈ నిధులను గత బీఆర్ఎస్ ప్రభుత్వం పంచాయతీల బ్యాంకు ఖాతాల్లో జమ చేసింది. అయితే ఆలస్యంగా నిర్మాణం చేపట్టిన పలు అభివృద్ధి పనులకు బిల్లులు ఇవ్వాల్సిన సమయంలో ఎన్నికలు రావడం, ఆ తర్వాత కాంగ్రెస్ అధికారం చేపట్టింది. ఈ క్రమంలో పెండింగ్ బిల్లులు ఇవ్వాల్సిన సరార్ అసలు పల్లె ప్రగతి పథకాన్ని పకన పెట్టేసి ఆ బిల్లులను పూర్తిగా విస్మరించింది. పలు గ్రామాల్లో గ్రామ పంచాయతీ భవనాలు, వైకుంఠధామం, డంపింగ్ యార్డ్, సెగ్రిగేషన్ షెడ్డు లాంటి అభివృద్ధి పనులను మాజీ సర్పంచులు పూర్తి చేశారు. వీటి కోసం ఒకో గ్రామంలో రూ.10 లక్షల నుంచి రూ.50 లక్షల వరకు పెట్టుబడి పెట్టారు. ఆ బిల్లులు కోసం మాజీ సర్పంచులు ఎదురుచూస్తున్నా ప్రభుత్వం కనికరించడం లేదు. పెండింగ్ బిల్లులు ఇవ్వాలని ఇప్పటికే పలువురు సర్పంచులు ముఖ్యమంత్రి రేవంత్ రెడ్డిని కలిసి విన్నవించినా ప్రయోజనం లేకుండా పోయింది.
ఉమ్మడి నల్లగొండ జిల్లాలో 1,740 గ్రామ పంచాయతీలు ఉండగా సుమారు రూ.130 కోట్ల బిల్లులు పెండింగ్లో ఉన్నట్లు తెలుస్తున్నది. ఏడాది క్రితం చేసిన వివిధ అభివృద్ధి పనులకు ఇప్పటివరకు బిల్లులు రాలేదు. నల్లగొండ జిల్లాలో సుమారు రూ.50 కోట్లు, సూర్యాపేటలో రూ.40 కోట్లు, యాదాద్రి భువనగిరిలో రూ. 30 కోట్ల బిల్లులు పెండింగ్లో ఉన్నాయి.
గత ప్రభుత్వం చేపట్టిన పల్లె ప్రగతిలో మా గ్రామంలో అభివృద్ధికి లక్షలు వెచ్చించి పనులు చేశాం. పల్లె ప్రకృతి వనానికి నాలుగున్నర లక్షల రూపాయలు, పంచాయతీ బిల్డింగ్కు 20 లక్షలు, పారిశుధ్య పనులకు 3 లక్షలు, సీసీ రోడ్ల నిర్మాణాలకు 10 లక్షల రూపాయలు ఖర్చు చేసినం. వాటికి సంబంధించిన బిల్లులను కాంగ్రెస్ ప్రభుత్వం విడుదల చేయడం లేదు. మా పదవీ కాలం ముగిసి ఐదు నెలలు కావస్తున్నా బిల్లులు రాకపోవడంతో ఆర్థికంగా ఇబ్బంది పడుతున్నాం. అభివృద్ధి పనులకు అప్పులు తెచ్చి మరీ చేశాం. ఇప్పటివరకు పెండింగ్ నిధులు రాకపోవడంతో వడ్డీలు కట్టలేక చితికిపోతున్నాం. ఇప్పటికైనా ప్రభుత్వం పెండింగ్ నిధులు విడుదల చేయాలి.
-గుండెబోయిన శ్రీలతాజంగయ్య యాదవ్, మాజీ సర్పంచ్, చెన్నుగూడెం, నల్లగొండ మండలం