మునుగోడు, జూలై 20: మునుగోడు మండల కేంద్రంలో గంజాయిని విక్రయిస్తున్న ఐదుగురు నిందితులను శనివారం పోలీసులు అరెస్ట్ చేసి రిమాండ్ తరలించారు. వారి వద్ద నుంచి సుమారు రూ.25 వేలు విలువ చేసే కిలో గంజాయిని స్వాధీనం చేసుకున్నారు. ఈ సందర్భంగా స్థానిక పోలీస్స్టేషన్ ఏర్పాటు చేసిన విలేకరుల సమావేశంలో కేసుల వివరాలను ఎస్పీ శరత్చంద్ర పవర్ వెల్లడించారు. మండల కేంద్రంలోని లక్ష్మీదేవిగూడెం రోడ్డు పక్కన పశువుల సంతలోని షెడ్డు వద్ద గంజాయి అమ్ముతున్నారనే సమాచారం మేరకు అక్కడ చేరుకున్న పోలీసులు అనుమానాస్పదంగా అక్కడ ఉన్న ఐదుగురు వ్యక్తులను అదుపులోకి తీసుకొని విచారించగా వారి వద్ద నుంచి కిలో గంజాయి, 4 సెల్ఫోన్లు, 2 బైకులు స్వాధీనం చేసుకున్నారు.
పట్టుబడిన వారిలో మునుగోడు మండలం కొరటికల్ గ్రామానికి చెందిన బొల్లం వెంకటేశం, చండూరు మండలం కురంపల్లి గ్రామానికి చెందిన దోటి రామరాజు, మునుగోడు చెందిన అర్మేల్లి వికాస్, మునుగోడు మండలం కొంపెల్లి గ్రామానికి చెందిన వీరమల్ల లింగస్వామి, గుర్రంపోడు మండలం పురం గణేశ్ ఉన్నారు.
బొల్లం వెంకటేశం, దొటి రామరాజు హైదారాబాద్లోని ధూల్పేట చెందిన గుర్తు తెలియని వ్యక్తుల దగ్గర (5) ప్యాకెట్లలో 200 గ్రాములు రూ.2వేల చొప్పున మొత్తం రూ.10 వేల గంజాయిని కొనుగోలు చేసి మోటార్ బైక్ పై తీసుకొచ్చి లక్ష్మీదేవిగూడెంలోని పశువుల సంతకు తీసుకొచ్చివారి స్నేహితులకు సమాచారం ఇచ్చారు. అక్కడికి వారు వచ్చి 200 గ్రాములు చొప్పున తీసుకొని గంజాయి తాగే వ్యక్తులకు అమ్ముదామని తీసుకపోవడానికి సిద్ధంగా ఉండగా వారిని పట్టుకున్నట్లు చెప్పారు.
కాగా వివిధ గ్రామాలకు 35 మంది బాధితులను గుర్తించి పరీక్షలు నిర్వహించగా గంజాయి తీసుకుంటున్నట్లు తేలిందన్నారు. వారందరికీ కౌన్సెలింగ్ ఇచ్చినట్లు పేర్కొన్నారు. డీఎస్పీ శివరాంరెడ్డి ఆధ్వర్యంలో గంజాయిని, నిందితులను పట్టుకోవడంలో చాకచక్యంగా వ్యవహరించిన చండూరు సీఐ వెంకటయ్య, మునుగోడు ఎస్ఐ వెంకటేశ్వర్లు, సిబ్బంది రమేశ్, నర్సిం హ, వెంకన్న, నాగేశ్వర్రావు, ఆంజనేయలు, జానీ, మోహన్ను ఎస్పీ అభినందించారు.