సూర్యాపేట టౌన్, జూన్ 1 : తెలంగాణ రాష్ట్రం ఏర్పడి పదేండ్లు అవుతున్న సందర్బంగా బీఆర్ఎస్ ఆధ్వర్యంలో జూన్ 2, 3 తేదీల్లో నిర్వహించే వేడుకలను విజయవంతం చేయాలని బీఆర్ఎస్ సూర్యాపేట జిల్లా అధ్యక్షుడు, మాజీ ఎంపీ బడుగుల లింగయ్యయాదవ్ శనివారం ఒక ప్రకటనలో కోరారు. 14 సంవత్సరాలు ఉద్యమం చేసి తెలంగాణ రాష్ర్టాన్ని సాధించిన మహనీయుడు కేసీఆర్ అని తెలిపారు.
సాధించిన తెలంగాణకు తొలి ముఖ్యమంత్రిగా ఉండి నీళ్లు, నిధులు, ఉద్యోగాలు తదితర వాటిని అన్నీ సమకూర్చి దేశానికే రాష్ర్టాన్ని ఆదర్శంగా నిలిపారని గుర్తు చేశారు. 24 గంటల విద్యుత్, విద్య, వైద్యం అన్ని రంగాల్లో మార్పులు తీసుకొచ్చారని పేర్కొన్నారు. బీఆర్ఎస్ తెలంగాణ కోసం పుట్టిన పార్టీ అని, ఈ నెల 2న బీఆర్ఎస్ పార్టీ కార్యాలయంలో 10 గంటలకు పార్టీ పతాకావిష్కరణ, జాతీయ పతాకావిష్కరణ నిర్వహించనున్నట్లు తెలిపారు. జిల్లాకు సంబంధించిన ముఖ్య నాయకులు, బీఆర్ఎస్ శ్రేణులు, ప్రజలు ఈ ఉత్సవాల్లో పాల్గొనాలని, జిల్లా అంతటా పండ్ల పంపిణీ, ఇతర సేవా కార్యక్రమాలు చేపట్టాలని కోరారు.