నిడమనూరు, జూన్ 18 : భూ వివాదం నేపథ్యంలో నిడమనూరు పోలీస్ స్టేషన్లో మంగళవారం ఓ రైతు పురుగుల మందు తాగి ఆత్మహత్యాయత్నానికి పాల్పడ్డాడు. బాధిత కుటుంబ సభ్యులు తెలిపిన వివరాల ప్రకారం.. ఎర్రబెల్లి గ్రామానికి చెందిన తుంగతుర్తి వెంకటాచారి 11 గంటల సమయంలో పోలీస్ స్టేషన్కు చేరుకుని తన వెంట కవర్లో తెచ్చుకున్న పురుగుల మందు డబ్బాను ఒక్కసారిగా తీసి తాగేశాడు. గమనించిన సిబ్బంది డబ్బాను లాక్కొని స్టేషన్ ఎదురుగా ఉన్న ప్రైవేట్ నర్సింగ్ హోమ్కు తీసుకెళ్లారు. పరిస్థితి విషమం కావడంతో మిర్యాలగూడ ప్రభుత్వ ఏరియా దవాఖానకు, అనంతరం నల్లగొండ జిల్లా కేంద్ర దవాఖానకు తరలించి వైద్య సేవలందిస్తున్నారు.
ఎర్రబెల్లి గ్రామానికి చెందిన తుంగతుర్తి వెంకటాచారి (65) తన భార్య లింగమ్మ పేరున ధర్మాపురం గ్రామ శివారులో ఉన్న ఎ.1.16 గుంటల భూమిని పద్దెనిమిది సంవత్సరాల క్రితం తన కూతురు ధనలక్ష్మి వివాహం కోసం కన్నెకల్కు చెందిన తన మేనల్లుడు దేశోజు కనకాచారికి అమ్మకానికి పెట్టి రూ.50 వేలు తీసుకున్నాడు. మిగతా మొత్తం చెల్లించకపోవడంతో రిజిస్ట్రేషన్ చేయలేదు. గత 18 ఏండ్లుగా ఇరువురి నడుమ వివాదం కొనసాగుతున్నది. సదరు భూమికి వెంకటాచారి భార్య లింగమ్మ పేరున పట్టాదారు పాస్ పుస్తకాలు మంజూరవగా ఆమె తన కుమార్తె మేలోజు ధనలక్ష్మి పేరున పట్టా చేశారు. కాగా దేశోజు కనకాచారి సదరు వివాదాస్పద భూమి చుట్టూరా ఇటీవల కంచె ఏర్పాటు చేశాడు. దీంతో వెంకటాచారి ఈయనతో పాటు మేలోజు యాదయ్య, మేలోజు ధనలక్ష్మి, ట్రాక్టర్ డ్రైవర్ మసిముక్కు శ్రీను ఈ నెల 11 న కంచె ను తొలగించి ట్రాక్టర్తో భూమిని దున్నారు.
13న కనకాచారి పోలీసులకు ఫిర్యాదు చేయడంతో నలుగురిపై కేసు నమోదు చేశారు. ఐదు రోజులుగా స్టేషన్కు రప్పిస్తుండటంతో తీవ్ర మనస్తాపానికి గురై పురుగుల మందు డబ్బాతో వెంకటాచారి నిడమనూరు పోలీస్ స్టేషన్ కు చేరుకున్నాడు. ఎస్ఐ. సమక్షంలోనే పురుగుల మందు తాగాడు. ప్రస్తుతం ఆయన ఆరోగ్య పరిస్థితి విషమంగా ఉన్నట్లు వైద్యులు తెలిపారు. ఘటనపై నిడమనూరు ఎస్ఐ జె.గోపాల్రావు వివరణ కోరగా దేశోజు కనకాచారి ఫిర్యాదు మేరకు వెంకటాచారితోపాటు మరో ముగ్గురి పై ఈ నెల 13న కేసు నమోదు చేసినట్లు తెలిపారు. వెంకటాచారికి ఆయన సోదరుడు ధనయ్యచారితో ఉన్న మరో భూ వివాదం కారణంగానే ఈ ఘటనకు పాల్పడినట్లు వివరించారు. తాము వెంకటాచారిని స్టేషన్కు పిలువలేదని, ఆయన పురుగుల మందు తాగి స్టేషన్ లోపలికి రాగానే గమనించి దవాఖానకు తరలించామని చెప్పుకొచ్చారు.