నల్లగొండ ప్రతినిధి, మే 13 (నమస్తే తెలంగాణ) : పార్లమెంట్ ఎన్నికల పోలింగ్ ప్రక్రియ ముగిసింది. ఇక లెక్కింపు మాత్రమే మిగిలింది. అయితే ఫలితం తెలుసుకోవడానికి 21 రోజుల పాటు వేచి చూడాల్సిందే. దేశ వ్యాప్తంగా పోలింగ్ ప్రక్రియ ముగిసిన తర్వాత వచ్చే నెల 4న ఓట్ల లెక్కింపు చేపట్టనున్నారు. ఈ నేపథ్యంలో బరిలో నిలిచిన అభ్యర్థులతోపాటు రాజకీయ నాయకులు, జిల్లా ప్రజల్లోనూ ఫలితాలపై అప్పుడే అంచనాలు మొదలయ్యాయి. అభ్యర్థుల భవితవ్యం ఈవీఎం బాక్సుల్లో నిక్షిప్తం కాగా.. జననాడిని అంచనా వేసేందుకు పోలింగ్ ప్రక్రియ కొనసాగుతుండగానే పలువురు ఆరా తీయడం కనిపించింది. ప్రధాన పార్టీలైన బీఆర్ఎస్, కాంగ్రెస్తోపాటు బీజేపీ, సీపీఎం, స్వతంత్ర అభ్యర్థులు సైతం ఎవరి లెక్కల్లో వారు మునిగి తేలుతున్నారు.
ఉమ్మడి నల్లగొండ జిల్లాలో పార్లమెంట్ ఎన్నికల పోలింగ్ ప్రశాంతంగా ముగిసింది. నల్లగొండ, భువనగిరి స్థానాల అభ్యర్థుల భవితవ్యం వచ్చే నెల 4న తేలనుంది. రాష్ట్రంలో నాలుగో దశలో ఎన్నికలు జరుగగా, ఇంకా మూడు దశల ఎన్నికలు పూర్తి కావాల్సి ఉంది. దేశ వ్యాప్తంగా పార్లమెంట్ ఎన్నికల పోలింగ్ ముగిసిన తర్వాత దేశమంతటా ఒకేసారి ఓట్ల లెక్కింపు చేపట్టనున్నారు. ఈ క్రమంలో ఫలితం వెల్లడి కావడానికి ఇంకా 21 రోజుల సమయం ఉంది. దీంతో ఈ రోజు పోలింగ్ ముగిసిన వెంటనే పోలింగ్ కేంద్రాల వారీగా పోలైన ఓట్ల లెక్కలను సేకరించే పనిలో ప్రధాన పార్టీలు, వారి అభ్యర్థులు పడ్డారు. గతం కంటే ఈ సారి పోలింగ్ శాతం పెరుగడంతో అది ఎవరికి లాభిస్తుందనే దానిపై చర్చోపచర్చలు మొదలు పెట్టారు. మంగళవారం తుది పోలింగ్ లెక్కలు వెల్లడి కానున్న నేపథ్యంలో ఆ తర్వాత పోలింగ్ కేంద్రాలు, గ్రామాలు, మండలాల వారీగా, ఆ తర్వాత అసెంబ్లీ నియోజకవర్గాల వారీగా అంచనాలకు సిద్ధపడనున్నారు. అయితే బీఆర్ఎస్, కాంగ్రెస్, బీజేపీ అభ్యర్థులతోపాటు ఆ పార్టీ శ్రేణుల్లో పోలింగ్ ట్రెండ్పై తీవ్ర ఉత్కంఠత నెలకొంది. డిసెంబర్లో వెలువడిన అసెంబ్లీ ఎన్నికల ఫలితాలను పరిగణలోకి తీసుకుని కూడా ప్రస్తుత పోలింగ్ సరళిపై దృష్టి సారించే అవకాశాలు కనిపిస్తున్నాయి. అసెంబ్లీ ఎన్నికల్లో బూత్ల వారీగా పోలైన ఓట్ల లెక్కలను ముందేసుకుని ప్రస్తుత ఎన్నికల్లో ఎన్ని రావచ్చన్న దానిపైనా పార్టీ శ్రేణుల నుంచి వివరాలు తెప్పించుకునే పనిలో పడ్డారు. తమకు ఆయా బూత్ల వారీగా ఎన్నెన్ని ఓట్లు పడే అవకాశాలు ఉన్నాయనే లెక్కలను ప్రధాన పార్టీల అభ్యర్థులు వేస్తున్నారు. మరోవైపు సోమవారం పోలింగ్ జరుగుతుండగానే.. పలువురు మీడియా సిబ్బంది, సర్వే సంస్థల సిబ్బంది ఎగ్జిట్ పోల్స్ కోసం ఓటరు నాడిని తెలుసుకునే ప్రయత్నాలు చేస్తూ కనిపించారు. అసెంబ్లీ ఎన్నికల్లో జయకేతనం ఎగురవేసిన కాంగ్రెస్.. పార్లమెంట్ ఎన్నికల్లోనూ తమదే విజయమన్న ధీమా ఆ పార్టీ అభ్యర్థులు వ్యక్తం చేస్తున్నారు. బీఆర్ఎస్ కూడా ఓటర్లు పునరాలోచనతో తిరిగి కేసీఆర్కే జై కొట్టారని, తమకే విజయావకాశాలు ఉన్నట్లుగా లెక్కలు వేస్తున్నారు. ఇక బీజేపీ భువనగిరిలో విజయం తమదేనని, నల్లగొండలో సైతం తాము గణనీయంగా ఓట్లను సాధిస్తామన్న విశ్వాసాన్ని వ్యక్తం చేస్తున్నారు.
డిసెంబర్లో జరిగిన అసెంబ్లీ ఎన్నికల ఫలితాలను పరిశీలిస్తే.. ఉమ్మడి నల్లగొండ జిల్లాలో మొత్తం 12 అసెంబ్లీ స్థానాలు ఉన్నాయి. అందులో కాంగ్రెస్ 11, బీఆర్ఎస్ ఒక స్థానంలో విజయం సాధించాయి. నల్లగొండ పార్లమెంట్ స్థానం పరిధిలోని ఏడు అసెంబ్లీ స్థానాలకు ఒక్క సూర్యాపేట మినహా మిగతా అన్ని స్థానాల్లోనూ కాంగ్రెస్ విజయం సాధించింది. భువనగిరి పార్లమెంట్ స్థానం పరిధిలోని జనగాంలో బీఆర్ఎస్ మినహా మిగతా అన్ని చోట్లా కాంగ్రెస్ ఎమ్మెల్యేలు గెలుపొందారు. దీంతో ఈ సారి కూడా రెండు చోట్లా తమదే విజయమన్న ధీమా కాంగ్రెస్ నేతలు వ్యక్తం చేస్తున్నారు. అయితే.. 2019లో బీఆర్ఎస్ 9 మంది ఎమ్మెల్యేలను గెలుపొందినా కాంగ్రెస్ రెండు ఎంపీ స్థానాలను గెలుచుకున్నట్లే.. ఈ సారి బీఆర్ఎస్ కూడా అదే విధంగా రెండు స్థానాల్లో విజయం సాధిస్తుందన్న విశ్వాసాన్ని బీఆర్ఎస్ నేతలు వ్యక్తం చేస్తున్నారు. ఈ ఐదు నెలల కాలంలో కాంగ్రెస్ సర్కార్పై ప్రజల్లో వచ్చిన వ్యతిరేకత తమకు విజయానికి దోహదం చేస్తున్న నమ్మకంతో బీఆర్ఎస్ నేతలు ఉన్నారు. ఇక మోదీ చరిష్మాతోపాటు బూర నర్సయ్యగౌడ్ గతంలో ఎంపీగా ప్రజలకు చిరపరిచితుడు కావడంతో భువనగిరిలో విజయం తమదేనని కమలం నేతలు ఢంకా బజాయించి చెప్తున్నారు. ఇలా ఎవరి ధీమాలో వారు ఉన్నా.. ఓట్ల లెక్కింపునకు మరో మూడు వారాల గడువు ఉండడంతో అప్పటివరకు చర్చోపచర్చలు, అంచనాలపై అంచనాలు కొనసాగనున్నాయి.