రామగిరి/బొడ్రాయిబజార్, జూలై 22 : కాంగ్రెస్ పార్టీ ఎన్నికల ముందు తమకు ఇచ్చిన హామీలను తక్షణమే అమలు చేయాలని ఆశ కార్యకర్తలు డిమాండ్ చేశారు. నల్లగొండ, సూర్యాపేట కలెక్టరేట్ల ఎదుట సోమవారం సీఐటీయూ ఆధ్వర్యంలో వారు ధర్నా నిర్వహించారు. ఈ సందర్భంగా ఆయా కార్యక్రమాల్లో సీఐటీయూ రాష్ట్ర ఉపాధ్యక్షుడు తుమ్మల వీరారెడ్డి, శ్రామిక మహిళా సమాఖ్య సూర్యాపేట జిల్లా కార్యదర్శి చెరుకు యాకలక్ష్మి మాట్లాడుతూ ఈ బడ్జెట్ సమావేశాల్లోనే పెరిగిన ధరలకు అనుగుణంగా ఫిక్స్డ్ వేతనం రూ. 18వేలు అమలు చేయాలన్నారు.
ఇన్యూరెన్స్ రూ. 50లక్షలు ఇవ్వాలని, 20 రోజులు క్యాజువల్ సెలవులు ఇవ్వాలని, 6నెలల వేతనంతో కూడిన మెడికల్ లీవ్స్, పీఎఫ్, ఈఎస్ఐ, ప్రమాద బీమా, రిటైర్మెంట్ బెనిఫిట్స్ కల్పించాలని కోరారు. గత మూడు సంవత్సరాలుగా యూనిఫామ్ ఇవ్వడం లేదని, 20సంవత్సరాలుగా పని చేస్తున్న ఆశ వర్కర్లను పరీక్షల పేరుతో తొలగించాలని కేంద్రం కుట్రలు చేస్తున్నదని చెప్పారు. అనంతరం డిమాండ్స్ కూడిన వినతి పత్రాన్ని నల్లగొండ కలెక్టర్ సి.నారాయణరెడ్డి, సూర్యాపేట కలెక్టర్ తేజస్ నంద్ లాల్ పవార్కు అందజేశారు. ఈ ధర్నాలో సీఐటీయూ నల్లగొండ జిల్లా అధ్యక్షుడు చిన్నపాక లక్ష్మీనారాయణ, ఆశ యూనియన్ జిల్లా అధ్యక్ష, కార్యదర్శులు డి.మహేశ్వరి, టి.వెంకటమ్మ, సీఐటీయూ జిల్లా ఉపాధ్యక్షుడు ఎండీ సలీమ్, నాయకులు దండెంపల్లి సత్తయ్య, రమావత్ కవిత, వసంత, పార్వతమ్మ, విమల, ఆశ వర్కర్లు కవి, హుస్సేన్, పద్మ, తులసి, రాధా, నాగమణి, సంధ్య, విజయ, లింగమ్మ, వాని, ముత్యాల రాణి, కనకమ్మ, వాణి, పద్మ, పద్మశ్రీ, రమణ, లింగమ్మ తదితరులు పాల్గొన్నారు.