నల్లగొండ, జూలై 9 : నిర్మాణంలో ఉన్న ప్రభుత్వ వైద్య కళాశాల నిర్మాణం త్వరితగతిన పూర్తి చేయాలని కలెక్టర్ సి.నారాయణరెడ్డి ఇంజినీరింగ్ అధికారులను ఆదేశించారు. ఎస్ఎల్బీసీ వద్ద నిర్మాణంలో ఉన్న ప్రభుత్వ వైద్య కళాశాల నిర్మాణ పనులను మంగళవారం ఆయన తనిఖీ చేశారు. ఈ సందర్భంగా కలెక్టర్ కళాశాల మొత్తం కలియ తిరుగుతూ కళాశాల నిర్మాణ ప్లాన్ను పరిశీలించారు. ఇంకా ఎకడైనా లోటుపాట్లు ఉంటే ముందే సరి చేసుకోవాలని, కమ్యూనిటీ మెడిసిన్ సెంటర్లో అవసరమైన హాల్ ఏర్పాటు చేయాలని సూచించారు.
కొత్త భవనం నిర్మాణం ఆలస్యానికి గల కారణాలను ఇంజినీరింగ్ అధికారులను అడిగి తెలుసుకోగా ఆయన ఇసుక వల్ల ఆలస్యమైందని తెలిపారు. ఇందుకు జిల్లా కలెక్టర్ స్పందించి భవన నిర్మాణానికి అవసరమైన ఇసుకను సరఫరా చేసేందుకు సిద్ధంగా ఉన్నామని, సాధ్యమైనంత త్వరగా భవన నిర్మాణాన్ని పూర్తిచేయాలని అన్నారు. ఈ నెలాఖరు నాటికి పూర్తి చేయాలని ఆదేశించారు. ఇందుకు టీజీఎంఐడీసీ అధికారులతో పాటు కాంట్రాక్టర్ మాట్లాడుతూ ఆగస్టు 15 నాటికి భవనాన్ని పూర్తి చేసి ఇస్తామని తెలిపారు. కలెక్టర్ వెంట ప్రభుత్వ ప్రధాన ఆస్పత్రి సూపరింటెండెంట్ నిత్యానంద్, ప్రభుత్వ వైద్య కళాశాల ప్రిన్సిపాల్ రాజకుమారి, ఆయా విభాగాల అధిపతులు తదితరులు ఉన్నారు.
లక్ష్యాన్ని బట్టి ప్రతి శాఖ మొక్కలు నాటాలి
వన మహోత్సవం కింద ఆయా శాఖలకు నిర్దేశించిన లక్ష్యాల ప్రకారం మొకలు నాటాలని కలెక్టర్ సి.నారాయణరెడ్డి అధికారులను ఆదేశించారు. రాష్ట్ర ప్రభుత్వ ప్రధాన కార్యదర్శి శాంతికుమారి వివిధ అంశాలపై మంగళవారం హైదరాబాద్ నుంచి అన్ని జిల్లాల కలెక్టర్లు, సంబంధిత అధికారులతో వీడియో కాన్ఫరెన్స్ నిర్వహించారు. అనంతరం కలెక్టర్ జిల్లా అధికారులతో సమీక్షిస్తూ వన మహోత్సవం కింద నాటాల్సిన మొకలపై ఇదివరకే ఆయా శాఖల వారీగా లక్ష్యాలను నిర్దేశించామని, మొకలు నాటడంతో పాటు, వాటిని సంరక్షించాలని తెలిపారు.
నాటిన ప్రతి మొకకూ జియో ట్యాగింగ్ చేయాలని ఆదేశించారు. బదిలీల విషయంలో రాష్ట్ర ప్రభుత్వ ఆదేశాల మేరకు పూర్తి చేయాలన్నారు. క్షేత్రస్థాయిలో ఆశ, అంగన్వాడీ కార్యకర్తలు తనిఖీలు నిర్వహించి నివేదికల సమర్పించాలని ఆదేశించారు. ఈ వీడియో కాన్ఫరెన్స్లో అదనపు కలెక్టర్లు శ్రీనివాస్, పూర్ణచంద్ర, డీఆర్ఓ రాజ్యలక్ష్మి, జిల్లా పరిషత్ సీఈఓ ప్రేమ కరణ్ రెడ్డి, జిల్లా గ్రామీణ అభివృద్ధి అధికారి నాగిరెడ్డి, వ్యవసాయ శాఖ అధికారి శ్రవణ్, డీపీఓ మురళి, డీఎంహెచ్ఓ కళ్యాణ చక్రవర్తి, ఐసీడీఎస్ పీడీ సకుబాయి, వివిధ శాఖల జిల్లా అధికారులు పాల్గొన్నారు.