సూర్యాపేట టౌన్, జూలై 26 : కాళేశ్వరం ప్రాజెక్టుపై కాంగ్రెస్ చేసినదంతా దుష్ప్రచారమేనని.. రైతాంగానికి అందించేందుకు పుష్కలంగా నీళ్లు ఉన్నా ఇంత నిర్లక్ష్యమెందుకని మాజీ మంత్రి, సూర్యాపేట ఎమ్మెల్యే గుంటకండ్ల జగదీశ్ రెడ్డి కాంగ్రెస్ ప్రభుత్వాన్ని దుయ్యబట్టారు.
బీఆర్ఎస్ వర్కింగ్ ప్రెసిడెంట్ కేటీఆర్ సారథ్యంలో మాజీ మంత్రులు, ఎమ్మెల్యేలు, మాజీ ఎమ్మెల్యేల బృందంతో కలిసి శుక్రవారం ఆయన మేడిగడ్డ వద్ద కాళేశ్వరం ప్రాజెక్టును సందర్శించారు. ఈ సందర్భంగా జగదీశ్రెడ్డి మాట్లాడుతూ కాళేశ్వరంలో పుష్కలంగా నీళ్లున్నా ఇవ్వలేని నిస్సహాయ స్థితిలో కాంగ్రెస్ సర్కారు ఉందని, ఇప్పుడు నీళ్లు ఇస్తే ఎన్నికల ముందు వాళ్లు చేసిన తప్పుడు ప్రచారమంతా బయటపడుతుందని భయపడుతున్నారని అన్నా రు. కాంగ్రెస్ నాయకులు పంటలు ఎండబెట్టి రైతాంగాన్ని కన్నీళ్లు పెట్టించి రాక్షసానందం పొందుతున్నారని మండిపడ్డారు.
కాళేశ్వరం వద్ద ప్రస్తుతం 10 లక్షల క్యూసెక్కుల ప్రవాహం ఉందని, గతంలో 28 లక్షల క్యూసెక్కులకు పైగా నీరు వచ్చిన విషయాన్ని గుర్తుచేశారు. అంత ప్రవాహం ఉన్నప్పుడే కాళేశ్వరం ప్రాజెక్టు చెక్కు చెదరలేదని, ఒక్కగేటు కొంత కుంగితేనే కాంగ్రెస్ ఎంతో దుష్ప్రచారం చేసి రైతులను తప్పుదోవ పట్టించిందని ఆగ్రహం వ్యక్తం చేశారు. ప్రాజెక్టు వల్ల ఇబ్బంది లేదని ఇంజినీర్లు చెబుతున్నారని, ఇప్పుడు కూడా నీళ్లు ఇచ్చేందుకు సమస్య లేదని అంటున్నారని తెలిపారు.
కాంగ్రెస్ ప్రభుత్వం ఆ విషయాన్ని ఒప్పుకుంటే ప్రజల్లో అభాసుపాలవుతామనే భయపడుతున్నారని విమర్శించారు. అసలు సూర్యాపేట తదితర జిల్లాలకు నీళ్లు వచ్చే కన్నెపల్లి పంపుహౌజ్ కాళేశ్వరానికి 20 కిలోమీటర్ల పైన ఉన్నదని, అది ఎప్పటికీ నీళ్లను ఎత్తిపోస్తూనే ఉంటుందని తెలిపారు.
సుందిళ్ల, అన్నారంలో కొత్తగా ఏమైనా ఇబ్బందులు వస్తాయనే ప్రచారంతో కాంగ్రెస్ రైతాంగాన్ని తప్పుదోవ పట్టించిందని మండిపడ్డారు. కాళేశ్వరం ప్రాజెక్టు గేట్లకు మన జిల్లాకు నీళ్లిచ్చే కన్నెపల్లికి నీళ్లు ఎత్తిపోయడానికి సంబంధమే లేదని చెప్పారు. కాళేశ్వరంపై చేసిన దుష్ప్రచారానికి కాంగ్రెస్ రైతాంగానికి క్షమాపణ చెప్పి పంటలకు వెంటనే నీరందించాలని డిమాండ్ చేశారు.