నల్లగొండ, ఫిబ్రవరి 28: రాజీవ్ స్వగృహ శ్రీవల్లి టౌన్ షిప్లో మిగిలిన ఓపెన్ ప్లాట్లు పాక్షిక గృహ నిర్మాణాల వేలం మరోసారి వేయనున్నట్లు కలెక్టర్ వినయ్ క్రిష్ణారెడ్డి తెలిపారు. కలెక్టరేట్లోని ఉదయాదిత్య భవన్లో మంగళవారం ఔత్సాహికులతో నిర్వహించిన ప్రీ బిడ్ సమావేశంలో ఆయన మాట్లాడారు. ఈ నెల 16 నుంచి 18 వరకు మూడు రోజుల పాటు ఈ ప్లాట్ల వేలం నిర్వహించనున్నట్లు తెలిపారు. టౌన్ షిప్లో ఓపెన్ ప్లాట్లు, సెమీ ఫినిష్డ్ గృహాలు అనువైన ధరల్లో ఉన్నందున సద్వినియోగం చేసుకోవాలని సూచించారు. అలాగే మరోసారి ఈ నెల 10న ప్రీ బిడ్ సమావేశం నిర్వహించనున్నట్లు పేర్కొన్నారు.
ఓపెన్ ప్లాట్లకు చదరపు గజానికి కనిష్ట ధర రూ.6వేలు నిర్ణయించగా పాక్షిక గృహాలకు గజానికి రూ. 10,500 నిర్ణయించినట్లు వివరించారు రోడ్లు, డ్రైనేజీలు, తాగు నీటి సౌకర్యం కల్పించడానికి ప్రభుత్వం ఇప్పటికే రూ.2.70 కోట్లు కేటాయించినట్లు తెలిపారు. భౌతిక వేలంలో పాల్గొనే వారు కలెక్టర్ పేరు మీద రూ.10వేల డీడీ చెల్లించాలన్నారు. అదనపు వివరాల కోసం 91543 39209 నంబర్ సంప్రదించాలని పేర్కొన్నారు. ఈ సమావేవంలో అదనపు కలెక్టర్లు ఖుష్బూ గుప్తా, భాస్కర్ రావు, హౌసింగ్ పీడీ రాజ్ కుమార్, డీఎస్ఓ వెంకటేశ్వర్లు పాల్గొన్నారు.