సూర్యాపేట(నమస్తే తెలంగాణ)/నల్లగొండ, జూలై 24 : మాజీ మంత్రి, బీఆర్ఎస్ వర్కింగ్ ప్రెసిడెంట్ కల్వకుంట్ల తారక రామారావు జన్మదిన వేడుకలను బుధవారం ఉమ్మడి నల్లగొండ జిల్లా వ్యాప్తంగా ఘనంగా నిర్వహించారు. బీఆర్ఎస్ నాయకులు, కార్యకర్తలతోపాటు ప్రజలు పెద్దసంఖ్యలో పాల్గొని కేకులు కట్ చేశారు. స్వీట్లు పంపిణీ చేశారు. పలు ఆస్పత్రులు, అనాథాశ్రమాల్లో పండ్లు, బ్రెడ్డు పంపిణీ చేశారు. అన్నదానాలు నిర్వహించారు.
నల్లగొండ జిల్లా కేంద్రంలోని బీఆర్ఎస్ కార్యాలయంలో భారీ కేక్ కట్ చేయగా ఆ పార్టీ జిల్లా అధ్యక్షుడు, మాజీ ఎమ్మెల్యే రవీంద్రకుమార్, జడ్పీ మాజీ చైర్మన్ బండ నరేందర్రెడ్డి, మాజీ ఎమ్మెల్యేలు చిరుమర్తి లింగయ్య, కంచర్ల భూపాల్రెడ్డి తదితరులు పాల్గొన్నారు. అలాగే నకిరేకల్, దేవరకొండలో మాజీ ఎమ్మెల్యేలు చిరుమర్తి లింగయ్య, రమావత్ రవీంద్రకుమార్ ఆధ్వర్యంలో కేటీఆర్ జన్మదిన వేడుకలు నిర్వహించారు.
సూర్యాపేట జిల్లా కేంద్రంలోని ఎమ్మెల్యే క్యాంపు కార్యాలయంలో బీఆర్ఎస్ శ్రేణులు, ప్రజలు పాల్గొని భారీ కేక్ కట్ చేశారు. అనంతరం సూర్యాపేట జనరల్ ఆస్పత్రిలో రోగులకు పండ్లు పంపిణీ చేశారు. పలు చోట్ల అన్నదానాలు చేపట్టారు. కోదాడలో జరిగిన జన్మదిన వేడుకల్లో మాజీ ఎమ్మెల్యే బొల్లం మల్లయ్యయాదవ్ పాల్గొని కేక్కట్ చేశారు. తుంగతుర్తి నియోజకవర్గ వ్యాప్తంగా నాయకులు, కార్యకర్తలు కేటీఆర్ జన్మదిన వేడుకలు నిర్వహించారు.