నేరేడుచర్ల, జూన్ 25 : నకిలీ బంగారం పెట్టి బ్యాంకును మోసం చేసిన నిందితులను అరెస్ట్ చేసి రిమాండ్ చేసినట్లు హుజూర్నగర్ సీఐ చలమందరాజు తెలిపారు. కేసుకు సంబంధించిన వివరాలను ఆయన మంగళవారం తన కార్యాలయంలో విలేకరుల సమావేశంలో చెప్పారు. నేరేడుచర్ల మండలం వైకుంఠాపురం గ్రామానికి చెందిన కేశవరపు రాజేశ్ మిర్యాలగూడలో రాజేశ్ గోల్డ్ వర్క్ షాప్ పెట్టి నష్టపోయాడు. దాంతో
చేసిన అప్పులు తీర్చడం కోసం ఆంధ్రప్రదేశ్ రాష్ట్రంలోని తెనాలి, నెల్లూరు నుంచి నకిలీ బంగారు కట్టు (గొలుసు) తయారు చేయించాడు.
ఎవరికీ అనుమానం రాకుండా నకిలీ బంగారు ఆభరణాలపై హోల్మార్క్ కేడీఎం 916 ముద్ర వేయించాడు. గరిడేపల్లి మండలం రాయినిగూడెంలోని బ్యాంక్ ఆఫ్ బరోడాలో అప్రయిజర్గా పని చేస్తున్న నల్లగొండ జిల్లా బొమ్మకల్లు గ్రామానికి చెందిన జిల్లేపల్లి నరేందర్తో ఉన్న పాత పరిచయంతో ఆయనను కలిశాడు. ‘నేను తీసుకొచ్చే బంగారం నిజమైనది. నువ్వు ధ్రువీకరిస్తే నాకు బ్యాంకు మేనేజర్ లోన్ మంజూరు చేస్తాడు. లోన్ మంజూరైన తర్వాత నీకు కొంత నగదు ఇస్తాను’ అని చెప్పడంతో నరేందర్ ఒప్పుకొన్నాడు.
వీరిద్దరు కలిసి బ్యాంకును భారీగా మోసం చేయడం ప్రారంభించారు. రాజేశ్ తన పేరు మీద నకిలీ బంగారం పెట్టి లోన్ తీసుకోవడంతో పాటు అతని భార్య వర్షిత, అతడి బంధువులు కొమెరపూడి వెంకటాచారి, కణితి సాయిరాం, యర్రగొర్ల పరశురాం, దోనేటి ముఖేశ్, మోత్కూరి సూర్య చేత విడుతల వారీగా నకిలీ బంగారం పెట్టి సుమారు రూ. 53.89 లక్షలు లోన్ తీసుకున్నారు. మే 10 న రెన్యూవల్ కోసం వెళ్లగా మోసాన్ని
బ్యాంక్ అధికారులు గుర్తించారు. బ్యాంక్ మేనేజర్ శ్రీకాంత్ ఫిర్యాదు మేరకు ప్రధాన నిందితుడు కేశవరపు రాజేశ్ను పోలీసులు అరెస్టు చేశారు. అరెస్టు చేసిన వారిని హుజూర్నగర్ న్యాయస్థానం ముందు రిమాండ్ చేసినట్లు సీఐ తెలిపారు.