మునుగోడు, జూలై 15 : అంగన్వాడీ టీచర్లకు రూ.ఐదు లక్షలు, ఆయాలకు రూ.రెండు లక్షల రిటైర్మెంట్ బెనిఫిట్స్ ఇవ్వాలని, ఎన్నికల ముందు కాంగ్రెస్ ఇచ్చిన హామీని వెంటనే నెరవేర్చాలని సీఐటీయూ జిల్లా సహాయ కార్యదర్శి ఏర్పుల యాదయ్య , మునుగోడు మండల కన్వీనర్ వరికుప్పల ముత్యాలు డిమాండ్ చేశారు. సీఐటీయూ ఆధ్వర్యంలో సోమవారం మునుగోడులోని ఎమ్మెల్యే కోమటిరెడ్డి రాజగోపాల్ రెడ్డి క్యాంపు కార్యాలయం ఎదురుగా అంగన్వాడీలతో కలిసి ధర్నా చేశారు.
ఈ సందర్భంగా వారు మాట్లాడుతూ పెరుగుతున్న ధరలకు అనుకూలంగా వారి వేతనాలు చెల్లించాలని కోరారు. జీఓ నంబర్ పదిని రద్దుచేసి కొత్త జీఓ ఇవ్వాలన్నారు. కాంగ్రెస్ అధికారంలోకి వస్తే రిటైర్మెంట్ బెనిఫిట్స్ పెంచుతామని హామీ ఇచ్చిందని, అధికారంలోకి వచ్చి వంద రోజులు దాటినా సమస్యలు పట్టించుకోవడంలేదని తెలిపారు. అంగన్వాడీ జిల్లా నాయకులు రజిత, శోభ, సువర్ణ, విజయలక్ష్మి, సులోచన, శారద, అరుణ, విమలాదేవి, మరియమ్మ పాల్గొన్నారు.