నందికొండ, జనవరి 4 : నందికొండ పైలాన్కాలనీ సబ్ పోస్టాఫీసులోని తమ ఖాతాల నుంచి డబ్బులను కాజేసిన మాజీ సబ్ పోస్ట్మాస్టర్ రామకృష్ణపై చర్యలు తీసుకొని, తమ డబ్బు ఇప్పించాలని ఖాతాదారులు కోరారు. ఈ మేరుకు గురువారం హిల్కాలనీ హెడ్ పోస్టాఫీసు వద్ద ఆందోళన చేపట్టారు. తమ ఖాతాలకు పోస్టల్ అధికారులే బాధ్యులు కాగా.. డబ్బులు ఎందుకు ఇవ్వరని నిలదీశారు.
తాము ఫిర్యాదు చేసి 20 రోజులు గడుస్తున్నా అధికారులు పట్టించుకోవడం లేదని ఆగ్రహం వ్యక్తం చేశారు. విషయం తెలుసుకున్న దేవరకొండ పోస్టల్ ఇన్స్పెక్టర్ మదన్మోహన్ బాధితులతో మాట్లాడారు. పూర్తి స్థాయిలో దర్యాప్తు చేస్తున్నామని, ఖాతాదారుల ఓచర్ల పరిశీలన నల్లగొండలో చేపట్టాల్సి ఉన్నదని తెలిపారు. ఖాతాదారులు ఆందోళన చెందవద్దని, దర్యాప్తు పూర్తయ్యాక నగదును తిరిగి ఇస్తామని చెప్పారు. కార్యక్రమంలో ఖాతాదారులు రవి, మధు, చిన్నయ్య, రత్నమ్మ, జయశ్రీ, సంపూర్ణ, కోటేశ్వర్రావు, చెన్నకేశవులు పాల్గొన్నారు.