హుస్నాబాద్, జూలై 20: ‘చినుకు ఆగదు… వరద పారదు’…అన్న చందంగా మారింది సిద్దిపేట జిల్లా హుస్నాబాద్ ప్రాంత పరిస్థితి. వానకాలం ప్రారంభమై దాదాపు రెండు నెలలు గడుస్తున్నా సరైన వర్షాలు లేక కేవ లం ఆరుతడి పంటలకే పరిమితమైన రైతు లు ప్రధాన పంట అయిన వరి, మొక్కజొన్న సాగు చేసేందుకు జంకుతున్నారు. వరద పోయే ఒక్క వర్షం కూడా పడకపోవడమే ఇందుకు కారణం. హుస్నాబాద్ రెవెన్యూ డివిజన్ పరిధిలోని హుస్నాబాద్, అక్కన్నపేట, కోహెడ, బెజ్జంకి, ధూళిమిట్ట, మ ద్దూరు మండలాల్లోని చెరువులు, కుంటలు వర్షపు నీటికి నోచుకోలేదు.
తుఫాన్ ప్రభావంతో అంతటా భారీ వర్షాలు, వరదలతో కళకళలాడుతుంటే హుస్నాబాద్ డివిజన్లో మాత్రం చిరు జల్లులకే పరిమితమవుతోం ది. గతేడాది జూలై వరకు వరినాట్లు దాదాపు పూర్తయ్యాయి. చెరువులు, కుంటలు కూడా నిండుకుండల్లా మారాయి. ఈ ఏడాది కొద్ది మంది రైతులు మినహా మిగతా రైతులందరూ నార్లు పోసుకొని భారీ వర్షం కోసం ఎదురు చూస్తున్నారు. గడిచిన వారం రోజులుగా నిత్యం కారు మబ్బులు కమ్ముకోవ డం, చిన్నపాటి చిరుజల్లులు పడటం అనంతరం మబ్బులు కనపడకుండా పోవడం పరిపాటిగా మారింది. ఐదు రోజులుగా రోజూ చినుకులు పడుతున్నాయి తప్పా వర ద పారడం లేదు. కాలం దగ్గరపడుతున్న కొద్దీ రైతన్నల్లో ఆందోళన అధికమవుతోంది. గురువారం రాత్రి 26.18మి. మీటర్ల వర్షపాతం నమోదైంది. జూలైలో మొట్టమొదటిసారి గురువారం రాత్రి మాత్ర మే ఆశాజనకంగా వర్షం కురిసింది. సాయంత్రం మొదలైన వర్షం అర్ధరాత్రి దాటే వరకు పడటంతో కొన్ని ప్రాంతాలు జలమయమయ్యాయి తప్పా వరదలుమాత్రం పారలేదు.
బెజ్జంకి మండలంలో 24.3మి.మీటర్ల వర్షం పడగా, కోహెడ మండలంలో 36.4 మి.మీటర్లు, హుస్నాబాద్ మండలంలో 23.4మి.మీటర్లు, అక్కన్నపేట మండలం లో 23.6 మి.మీటర్లు, మద్దూరు మండలం లో 20.0 మి.మీటర్లు, ధూళిమిట్ట మండలంలో 29.4 మి.మీటర్ల వర్షం పడింది. మొత్తం మీద ఒకే రోజు రాత్రి ఆరు మండలాల్లో కలిపి 26.18 మి.మీటర్ల వర్షపాతం నమోదైంది. శుక్రవారం ఉదయం నుంచి రాత్రి వరకు వరకు వానముసురు ముసురుకుంది తప్పా భారీ వర్షం పడలేదు. వరుణు డు కరుణించి భారీ వర్షం పడాలని, మెట్ట ప్రాంతమైన హుస్నాబాద్ పంటలతో కళకళలాడాలని ఆశిద్దాం…