కౌడిపల్లి, జూలై 12 : వర్షాకాలం మొద లు కావడంతో వరినాట్లు జోరందుకున్నాయి. దీంతో గ్రామాల్లో కూలీల కొరత ఏర్పడింది. నాటువేసే సమయం అయిపోతుందనే ఉద్దేశంతో గ్రామాల్లోని కొందరు యూపీ, బీహార్, పశ్చిమబెంగాల్కు చెందిన కూలీలను పిలిపించి నాట్లు వేయిస్తున్నారు. తక్కువ ఖర్చుతో త్వరగా నాట్లు వేస్తున్న కూలీల వైపు రైతులు మొగ్గు చూపుతున్నారు. మెదక్ జిల్లాలో వరినాట్లకు మంచి డిమాండ్ ఉండడంతో ఉత్తరప్రదేశ్, బీహార్, పశ్చమబెంగాల్ రాష్ట్రాల నుంచి దాదాపు 100టీమ్లు వచ్చాయి. ఒక్కో టీమ్లో 15 నుంచి 20 మంది కూలీల చొప్పున ఉన్నారు. ఆయా రాష్టాల నుంచి వచ్చిన వారు టీమ్లుగా విడిపోయి సాగు ఎక్కువగా ఉండే ప్రాంతాలకు చేరుకొని జోరుగా నాట్లేస్తున్నారు. ఇక్కడి మహిళా కూలీల ద్వారా ఎకరా నాటేసేందుకు రూ.5 నుంచి 6వేలతో పాటు ఆలస్యం అవుతోంది. అదే యూపీ, పశ్చిమబెంగాల్, బీహా ర్ కూలీలు ఎకరాకు రూ.4500 చొప్పున తీసుకుంటున్నారు. స్పీడ్గా నాటేస్తున్నారు. ఉదయం 6గంటలకే పొలంలో దిగి సాయంత్రం వరకు ఎనిమిదెకరాలు నాటు పూర్తి చేస్తున్నారు. ఖర్చు తక్కువ అవుతుండటం, త్వరగా పని పూర్తవడంతో ఎక్కువ మంది రైతులు ఇతర రాష్ర్టాల కూలీలతోనే నాటు వేయిస్తున్నారు.
మా రాష్ట్రంలో సరైన పనుల్లేవు. అందుకే ఇక్కడికి ఉపాధి కోసం వస్తున్నాం. ప్రతి ఏడాది పంటల సీజన్లో రెండు నెలలపాటు వరినాట్లు వేసి సంపాదిస్తాం. ఆ తర్వాత సొంత ఊర్లకు వెళ్లి కుటుంబాలను పోషించుకుంటాం. అక్కడ రోడ్లపై చెరుకు రసం అమ్ముతూ అడ్డా కూలీలుగా పనిచేస్తాం.
ఇక్కడ రెండు సీజన్లలో మాకు వరి నాటు వేసే పని దొరుకుతుంది. టీమ్ వర్క్తో లాభం ఉంటుంది. ఒక టీం ఒక రోజులో ఎనిమిది ఎకరాలు నాటేస్తుంది. ఎకరాకు రూ.4500 చొప్పున అందరం కలిసి రూ.30వేలు సంపాదిస్తాం. రోజుకు ఒక్కొక్కరికీ రూ.1450 చొప్పున రెండు నెలల్లో రూ.87వేల వరకు సంపాదిస్తాం.