సంగారెడ్డి, జూన్ 14(నమస్తే తెలంగాణ): వానకాలం సీజన్ ప్రారంభమైనా రైతుల చేతిలో పైకం లేదు. ప్రభుత్వం రైతుబంధు స్థానంలో రైతుభరోసా పేరుతో పెట్టుబడి సాయం అందిస్తామని ప్రకటించినా ఇప్పటివరకు రైతుల ఖాతాల్లో డబ్బులు జమ చేయలేదు. దీనికితోడు ప్రభుత్వం రుణమాఫీ చేయడం లేదు. దీంతో రైతులు ప్రభుత్వం తీరుపై తీవ్ర ఆగ్రహం వ్యక్తం చేస్తున్నారు. సాగు కోసం రైతులు బ్యాంకుల్లో పంట రుణాలు తీసుకునేందుకు వీలుంది. సంగారెడ్డి జిల్లాలో ఇప్పటివరకు వార్షిక రుణ ప్రణాళిక ఖారారు కాలేదు. దీంతో బ్యాంకర్లు రైతులకు పంట రుణాలు మంజూరు చేయలేని పరిస్థితి నెలకొంది. రైతులకు దిక్కుతోచని పరిస్థితి నెలకొన్నది. 2024-25 ఆర్థిక సంవత్సరానికి సంబంధించి జిల్లా యంత్రాంగం, బ్యాంకర్లు సంయుక్తంగా వార్షిక రుణ ప్రణాళికను ప్రకటించాల్సి ఉంది. అయితే ఇప్పటి వరకు వార్షిక రుణ ప్రణాళికను ప్రకటించలేదు. ఏటా మే మాసంలోనే బ్యాంకర్లు, జిల్లా యంత్రాం గం వార్షిక రుణ ప్రణాళికను ప్రకటిస్తుంది. ఎన్నికల కోడ్ పేరుతో ఈ ఏడాది 2024-25 ఆర్థిక సంవత్సరానికి సంబంధించి వార్షిక రుణ ప్రణాళిక రూపకల్పన, ప్రకటనలో జాప్యం జరిగినట్లు అధికారులు చెబుతున్నారు. ఎన్నికల కోడ్ ముగిసినా ఇప్పటి వరకు ఇంకా వార్షిక రుణ ప్రణాళికను ప్రకటించలేదు. దీంతో బ్యాంకర్లు, జిల్లా యం త్రాంగం తీరుపై రైతులు, రైతు సంఘాలు అసంతృప్తి వ్యక్తం చేస్తున్నాయి.
రైతులకు పంట రుణాలు ఇవ్వటంలే బ్యాంకర్లు ఆసక్తిని చూపటం లేదు. ఏటా లీడ్ బ్యాంకు రైతులకు ఇవ్వాలిన పంట రుణాలకు సంబంధించి వార్షిక రుణ ప్రణాళికలో బ్యాంకుల వారీగా లక్ష్యాలను నిర్ధేశిస్తారు. సంగారెడ్డి జిల్లాలోని బ్యాంకర్లు లక్ష్యం మేరకు వందశాతం పంటరుణాలు ఇవ్వటం లేదు. పంట రుణాలను ఎక్కువగా బ్యాంకు ఖాతాల్లోనే సర్దుబాటు(రెన్యువల్) చేస్తున్నారు తప్ప కొత్త రుణాలు ఇవ్వకపోవటంతో రైతులు ఇబ్బందులు పడుతున్నారు. 2023-2024 ఆర్థిక సంవత్సరానికి వానకాలం, యాసంగి సీజన్లో రూ.2,725 కోట్ల పంట రుణాలు రైతులకు ఇవ్వాల్సి ఉండగా రూ.2,505 కోట్ల పంట రుణాలు మాత్రమే ఇచ్చారు. లక్ష్యం మేరకు వందశాతం పంటరుణాలు ఇవ్వలేదు. వానకాలం సీజన్లో రూ.1635 కోట్లు లక్ష్యంగా కాగా బ్యాంకర్లు 1,00,639 మంది రైతులకు రూ.1302 కోట్ల రుణాలు ఇచ్చారు. యాసంగి సీజన్లో రూ.1090 కోట్ల పంట రుణాలు ఇవ్వాల్సి ఉంది. 78,683 మంది రైతులకు రూ.1203 కోట్ల పంట రుణాలు ఇచ్చారు. ఏపీజీవీబీ, కెనరా బ్యాంకు మినహా ఇతర బ్యాంకులు లక్ష్యం మేరకు పంట రుణాలు ఇవ్వలేదు.
వానకాలం సీజన్ ప్రారంభానికి ముందే వార్షిక రుణ ప్రణాళిక ప్రకటించాల్సి ఉంది. కానీ సంగారెడ్డి జిల్లాలో 2024-25 ఆర్థిక సంవత్సరానికి సంబంధించి వార్షిక రుణ ప్రణాళికను ఇంకా ప్రకటించలేదు. లీడ్ బ్యాంకు నూతన ఆర్థిక సంవత్సరం ఆరంభంలోనే వార్షిక రుణ ప్రణాళికను సిద్ధం చేస్తుంది. జిల్లా కలెక్టర్ అనుమతితో ప్రతిఏటా మేలోనే వార్షిక రుణ ప్రణాళికను ప్రకటిస్తారు. వార్షిక రుణ ప్రణాళికలో పేర్కొన్న లక్ష్యాలకు అనుగుణంగా జిల్లాలోని బ్యాంకర్లు పంటరుణాలు, ఇతర రుణాలు మంజూరు చేస్తారు. ఎన్నికల కోడ్ కారణంగా వార్షిక రుణ ప్రణాళిక ప్రకటనలో జాప్యం జరిగినట్లు చెబుతున్నారు. గత ఆర్థిక సంవత్సరంలో రూ.7800 కోట్లతో వార్షిక రుణ ప్రణాళికను ప్రకటించారు. ప్రస్తుత ఆర్థిక సంవత్సరం 2024-25కు సంబంధించి లీడ్ బ్యాంకు సుమారు రూ.9వేల కోట్లతో వార్షిక రుణ ప్రణాళికను సిద్ధం చేసినట్లు తెలుస్తుంది. ఇందులో పంటరుణాలకు సంబంధించి రూ.3వేల కోట్ల లక్ష్యం నిర్దేశించుకున్నట్లు సమాచారం. వార్షిక రుణ ప్రణాళిక సిద్ధంగా ఉన్నప్పటికీ జిల్లా యంత్రాంగం బ్యాంకర్లతో సమావేశం నిర్వహించాల్సి ఉంది. అయితే జిల్లా యంత్రాంగం బ్యాంకర్లతో సమావేశం నిర్వహించడంలో జాప్యం చేస్తుంది. దీంతో వార్షిక రుణ ప్రణాళిక ఖరారు కావటం లేదు. రైతులు పంట రుణాల కోసం ఎదురుచూస్తున్న నేపథ్యంలో వెంటనే వార్షిక రుణ ప్రణాళికను ప్రకటించాలని రైతులు, రైతు సంఘాలు నేతలు జిల్లా యంత్రాంగాన్ని, బ్యాంకర్లను కోరుతున్నారు.