హుస్నాబాద్, జూలై 13: వానకాలం ప్రారంభమై నెలన్నరదాటుతోంది. ప్రారంభంలో కురిసిన వానలకు మురిసిపోయిన రైతులు జోరుగా ఆరుతడి పంటలు సాగు చేసుకున్నారు. అనంతరం వరుణుడు తెరమరుగు కావడంతో సాగు చేసిన పంటలను రక్షించుకునేందుకు రైతులు నానా తంటాలు పడుతున్నారు. గతేడాది జూన్ చివరలో, జూలై మొత్తం పుష్కలంగా వర్షాలు పడటం వల్ల సిద్దిపేట జిల్లా హుస్నాబాద్ రెవెన్యూ డివిజన్ పరిధిలోని హుస్నాబాద్, అక్కన్నపేట, కోహెడ, బెజ్జంకి, ధూళిమిట్ట, మద్దూరు మండలాల్లో వరినాట్లు జోరుగా పడ్డాయి. జూలై రెండో వారానికి గ్రామాల్లో ఎక్కడ చూసినా వరినాట్లు పడి పొలాలన్నీ కళకళలాడుతూ కనిపించాయి. చెరువులు, కుంటలు కూడా వర్షపు నీటితో నిండి రైతులు, ప్రజల్లో ధైర్యాన్ని నింపాయి.
మురిపించి తెరమరుగైన వరుణుడు
ఈ యేడు జూన్లో మురిపించిన వరుణుడు అనంతరం కనిపించక పోవడంతో ఉత్సాహంగా నార్లు పోసిపొలం దున్నేందుకు సిద్ధమైన రైతులకు నిరాశే మిగిలింది. ప్రారంభ వర్షాలకు నార్లు పోసిన రైతులు భారీ వర్షం ఎప్పుడు పడుతుందా అని ఎదురు చూస్తున్నారు. వరుణుడు కానరాక పోవడంతో కాడి (నాగలి) పట్టేందుకు ముందుకు రావడం లేదు. వరినారు ముదురుతుంటే ఆందోళకు గురవుతున్నారు. బావులు, బోర్లలో నీళ్లున్న కొందరు రైతులు మాత్రం వరినాట్లు వేసి వరుస తడులతో కాపాడుకుంటున్నారు. ఆరుతడి పంటలైన పత్తి, మొక్కజొన్న, కంది తదితర పంటలు మొలకెత్తగా మొలకలను కాపాడుకునేందుకు నానా పాట్లు పడుతున్నారు. జూన్ చివర నుంచి జూలై రెండోవారం వరకు వర్షం పడకపోవడంపై రైతులు దిగాలు చెందుతున్నారు. దున్నకుం డా బీళ్లుగా ఉన్న పొలాలను చూసి ఆందోళనకు గురవుతున్నారు. వరుణుడు కరుణించి వర్షాలు కురిస్తేనే సాగు ఊపందుకునే అవకాశం ఉంది. మరో పది రోజులపాటు వర్షాలు పడకుంటే నార్లు ఎత్తిపోయి రైతులు నష్టపోతారు.
జూన్లో 21.9, జూలైలో 3.3 సెం.మీ. వర్షపాతం
ఈ ఏడాది జూన్లో సిద్దిపేట జిల్లా హుస్నాబాద్ డివిజన్లోని ఆరు మండలాల్లో 21.9సెంటీమీటర్ల వర్షపాతం నమోదు కాగా జూలై 12వ తేదీ వరకు కేవలం 3.3సెంటీమీటర్ల వర్షపాతం మాత్రమే నమోదైంది. వర్షకాలంలో అతి ముఖ్యమైన జూలైలో వర్షాలు కురవకపోవడం తీవ్ర నష్టాన్ని మిగిల్చే అవకాశం ఉందని వ్యవసాయాధికారులు అంటున్నారు. బావుల్లో ఉన్న కొద్దిపాటి నీటితో రైతులు వరినాట్లు వేశారు. గతేడాది(2023) జూన్లో 6.2సెంటీమీటర్ల వర్షపాతం నమోదు కాగా జూలైలో ఏకంగా 10.9 సెంటీ మీటర్ల వర్షపాతం నమోదైంది. అంటే గతేడాది జూలైలో రైతులందరూ సాగు చేసుకొని సస్యరక్షణ చర్యల్లో నిమగ్నమయ్యారు. కానీ ఈసారి జూన్ లో వర్షం పడి జూలైలో అడ్రస్ లేకుండా పోయింది.
జూలైలో వర్షాలు పడకుంటే నష్టమే..
వర్షాలు పడకపోవడంతో చాలామంది రైతులు నార్లు పోసుకొని పొలం దున్న డం లేదు. భారీ వర్షం కురిస్తే తప్పా పొ లాలు దున్నేందుకు సిద్ధపడరు. గతేడాది అధిక వర్షాలు పడ్డాయి. గత జూలైలోనే దాదాపు పంటలన్నీ సాగయ్యాయి. కానీ ఈ యేడు జూలైలో తగినంత వర్షం పడక వరి, మొక్కజొన్నలాంటి పంటలు సాగు చేసేందుకు రైతులు ఇబ్బందులు పడుతున్నా రు. ఈ నెలలో వర్షం సమృద్ధిగా కురవకుంటే నారు పోసుకున్న రైతు లు, దుక్కి దున్నుకొని విత్తనాలు వేసేందుకు సిద్ధంగా ఉన్న రైతులు తీవ్రంగా నష్టపోవాల్సి వస్తుంది.
– మహేశ్, ఏడీఏ, హుస్నాబాద్