నంగునూరు, మే 1: కేంద్రం తెలంగాణకు గాడిద గుడ్డు ఇచ్చిందని చెప్పే రేవంత్రెడ్డి ఈ నాలుగు నెలల్లో నువ్వుచ్చింది కూడా గాడిద గుడ్డేనని మాజీమంత్రి, ఎమ్మెల్యే హరీశ్రావు విమర్శించారు. ఈ ఎన్నికలు అధికారం కోసం, పదవుల కోసం కాదని, తెలంగాణ భవిష్యత్ కోసమే అన్నారు. బుధవారం నంగునూరు మండలకేంద్రంలో బీఆర్ఎస్ అభ్యర్థి వెంకట్రామిరెడ్డికి మద్దతుగా హరీశ్రావు రోడ్షో నిర్వహించారు.
ఈ సందర్భంగా హరీశ్రావు మాట్లాడుతూ కేంద్రం పదేండ్లలో మొండిచేయి చూపితే, వంద రోజుల్లో ఆరు గ్యారెంటీలు అమలు చేస్తానని రేవంత్రెడ్డి మాట తప్పారన్నారు. రూ.2 లక్షలు రుణమాఫీ, రూ.4 వేల పింఛన్, రైతుబంధు, మహిళలకు రూ.2500, పంట బోనస్ రూ.500 ఇస్తామని చెప్పి ప్రజలను మోసం చేశారన్నారు. కేసీఆర్ వల్లే మన కాలువల్లోకి నీళ్లు వచ్చి రెండు పంటలు పండాయన్నారు.
రంగనాయకసాగర్ రిజర్వాయర్తో చెరువులు నింపి బంగారం లాంటి పంటలు పండించామన్నారు. ఈ ఎన్నికలు సిద్దిపేట ఆత్మగౌరవ ప్రతీక అని, సిద్దిపేట పరువు తీసే ప్రయత్నం చేస్తున్న రేవంత్రెడ్డికి తగిన గుణపాఠం చెప్పాలని ప్రజలకు పిలుపునిచ్చారు. మంచి వ్యక్తి అయిన వెంకట్రామిరెడ్డిని భారీ మెజార్టీతో గెలిపించాలన్నారు. ఎంపీ అభ్యర్థి వెంకట్రామిరెడ్డి మాట్లాడుతూ కలెక్టర్గా నాడు సేవలు అందించానని, నేడు ఎంపీ అభ్యర్థిగా మీ ముందుకు వచ్చానన్నారు.
కేసీఆర్ ఆశీస్సులు, హరీశ్రావు సూచనతో గెలుస్తాననే నమ్మకం ఏర్పడిందని ధీమా వ్యక్తం చేశారు. రూ.వంద కోట్లతో ట్రస్ట్ ఏర్పాటు చేసి పేద పిల్లల విద్య కోసం, పోటీ పరీక్షలు ప్రిపేరయ్యే వారికి ఉచిత శిక్షణ కేంద్రాలు ఏర్పాటు చేస్తానన్నారు. రూ.పది లక్షల ప్రమాద బీమా అందరికీ చేస్తానని ప్రజలకు హామీనిచ్చారు. కార్యక్రమంలో నాయకులు జాప శ్రీకాంత్రెడ్డి, ఎడ్ల సోమిరెడ్డి, లింగంగౌడ్ తదితరులు పాల్గొన్నారు.