జగదేవ్పూర్, జూలై 22: ప్రభుత్వ స్కూళ్లల్లోనే ఉత్తమ బోధన ఉంటుందని సిద్దిపేట కలెక్టర్ మనుచౌదరి అన్నారు. సోమవారం సిద్దిపేట జిల్లా జగదేవ్పూర్ మండలంలోని నిర్మల్నగర్, అలిరాజ్పేట ప్రాథమిక పాఠశాలలు, జగదేవ్పూర్ కేజీబీవీని ఆయన ఆకస్మికంగా సందర్శించారు. కాసేపు పది, ఆరో తరగతి పిల్లలకు గణితం, హిందీ బోధించారు. కేజీబీవీలో వంటగది స్టోర్రూమ్ను పరిశీలించి సంతృప్తి వ్యక్తం చేశారు. నిర్మల్నగర్ అంగన్వాడీ పిల్లలతో కాసేపు ముచ్చటించారు. అనంతరం మండల అధికారులతో కలిసి జగదేవ్పూర్ కేజీబీవీ ఆవరణలో మొక్కలు నాటారు. ఈ సందర్భంగా ఆయన మాట్లాడుతూ ప్రైవేట్ పాఠశాలలకు దీటుగా ప్రభుత్వ బడుల్లో మెరుగైన వసతులు కల్పిస్తున్నామన్నారు. పిల్లలను ప్రైవేట్ బడులకు పంపకుండా సర్కారు బడుల్లోనే చదివేలా చూడాలన్నారు.
ప్రభుత్వ పాఠశాలల బలోపేతానికి విద్యార్థుల సంఖ్యను పెంచేందుకు అధికారులు ప్రణాళికలు రూపొందించాలని సూచించారు. అలిరాజ్పేట, నిర్మల్నగర్ పాఠశాలలకు ఉపాధ్యాయులను పంపించాలని ఎంఈవోకి సూచించారు. కేజీబీవీకి ప్రహారీ లేక విద్యార్థులు ఇబ్బందులు పడుతున్నారని తెలుపగా సర్వేయర్తో కొలతలు వేయించి వెంటనే నిర్మించేలా చూడాలని సంబంధిత అధికారులను ఆదేశించారు. ఆయన వెంట ఆర్డీవో బన్సీలాల్, తహసీల్దార్ కృష్ణమోహన్, ఎంపీడీవో యాదగిరి, ఎంఈవో ఉదయభాస్కర్రెడ్డి, ఎంపీవో శ్రీనివాసవర్మ, జగదేవ్పూర్ కార్యదర్శి హరిప్రసాద్, కేజీబీవీ ఎస్వో ఉమామహేశ్వరి, ఉపాధ్యాయులు పాల్గొన్నారు.