గజ్వేల్, జూలై 6: కాంగ్రెస్ సర్కారు గజ్వేల్ నియోజకవర్గ అభివృద్ధిపై శీతకన్ను చూపుతున్నది. కేసీఆర్ ప్రాతినిధ్యం వహిస్తున్న ఈ నియోజకవర్గంపై కక్షపూరితంగా వ్యవహరిస్తున్నది. ఇక్కడ నిర్మిస్తున్న మోడల్ బస్టాండ్ల పనులే దీనికి ఉదాహరణగా చెప్పవచ్చు. గజ్వేల్-ప్రజ్ఞాపూర్లో ప్రయాణికుల సౌకర్యార్థం మోడల్ బస్టాండ్ల నిర్మాణ పనులను బీఆర్ఎస్ ప్రభుత్వం ప్రారంభించింది. ప్రారంభంలో పనులు శరవేగంగా కొనసాగి స్లాబ్ దశలో ఆగిపోయాయి. కాంగ్రెస్ సర్కారు వచ్చాక కాంట్రాక్టర్లకు బిల్లులు చెల్లించకపోవడంతో పనుల్లో పురోగతి కరువైంది. అసలే వర్షాకాలం కావడంతో గజ్వేల్, ప్రజ్ఞాపూర్లో వర్షం పడితే తలదాచుకునేందుకు ప్రయాణికులు ఇబ్బందులు ఎదుర్కొంటున్నారు. నాలుగు నెలలుగా పనులు నిలిచిపోయాయి. గజ్వేల్ పట్టణానికి నిత్యం వేలాదిగా ప్రయాణికులు ఆర్టీసీ బస్సుల్లో వస్తుంటారు.
నిత్యం ప్రభుత్వ, ప్రైవేట్ ఉద్యోగులు, మహిళలు, వ్యాపారులు ఆర్టీసీ బస్సుల్లో రాకపోకలు సాగించేందుకు బస్టాండ్ల వద్దకు వస్తుంటారు. ప్రయాణికుల కోసం గజ్వేల్ పట్టణంలో రూ.2.56 కోట్లతో మోడల్ బస్టాండ్ నిర్మాణానికి కేసీఆర్ శ్రీకారం చుట్టారు. ప్రజ్ఞాపూర్ చౌరస్తాలో ఏన్నో ఏండ్లుగా బస్టాండ్ నిర్మాణం కోసం గ్రామస్తులు అప్పట్లో ప్రజాప్రతినిధులకు, మం త్రులు, ఎమ్యెల్యేలకు వినతిపత్రాలు ఇచ్చిన ఫలితం దక్కలేదు. కానీ, కేసీఆర్ కృషి ఫలితంగా ప్రజ్ఞాపూర్ చౌరస్తాలో రూ.3.81కోట్లతో బస్టాండ్ నిర్మాణానికి నిధులు మంజూరు కావడంతో పనులు ప్రారంభించారు. కాంగ్రెస్ సర్కారు వచ్చాక వీటి పనులకు గ్రహణం పట్టింది.
బిల్లులు చెల్లిస్తే కాని పనులు ప్రారంభం కావు
గజ్వేల్, ప్రజ్ఞాపూర్లో నిర్మాణ దశలో ఆగిపోయిన బస్టాండ్లకు సంబంధించిన బిల్లులు చెల్లిస్తే కాని పనులు ప్రారంభించలేమని కాంట్రాక్టర్లు కొద్ది రోజుల క్రితం చేతులెత్తేశారు. కోట్లాది రూపాయల బిల్లులు పెండింగ్లో ఉండడంతో పనులు నిలిచిపోయాయి. గజ్వేల్లో కొనసాగుతున్న అభివృద్ధి పనుల బిల్లులు చెల్లించడానికి కాంగ్రెస్ ప్రభుత్వం ముందుకు రాకపోవడంతో ఎక్కడి పనులు అక్కడే నిలిచిపోతున్నాయి. బస్టాండ్ల నిర్మాణ పనులు మధ్యలోనే నిలిపోవడంతో ప్రజలు అసహనం వ్యక్తం చేస్తున్నారు.
బిల్లులు రాగానే పనులు ప్రారంభిస్తాం..
గజ్వేల్, ప్రజ్ఞాఫూర్లో నిర్మిస్తున్న బస్టాండ్కు సంబంధించి ఇప్పటి వరకు పూర్తయిన పనుల బిల్లులు చేసి పంపించాం. ఇప్పటి వరకు పూర్తయిన పనుల బిల్లులు రాలేదు. బిల్లులు రాగానే పనులు ప్రారంభించేలా చర్యలు చేపడతాం. ఉన్నతాధికారుల దృష్టికి ఈ విషయాన్ని తీసుకెళ్తాం.
– అజయ్, పీఆర్ డీఈ