మెదక్ మున్సిపాలిటీ/ రామాయంపేట, ఏప్రిల్ 23: జిల్లాలోని ప్రభుత్వ, ప్రైవేటు, ఏయిడెడ్ పాఠశాలలకు (1 నుంచి 9వ తరగతి వరకు) బుధవారం నుంచి వేసవి సెలవులను ప్రభుత్వం ప్రకటించింది. చివరి రోజు మంగళవారం విద్యార్థులకు ప్రోగ్రెస్ కార్డులు అందజేశారు. ఈ నెల 24 నుంచి జూన్ 11వ తేదీ వరకు సెలవులు ఇచ్చారు. జూన్ 12న పాఠశాలలు ప్రారంభంకానున్నాయి. జిల్లా వ్యాప్తంగా 965 ప్రభుత్వ బడులు, 80 వరకు ప్రైవేటు పాఠశాలలు ఉన్నాయి. ప్రైవేటు పాఠశాలలు వేసవి సెలవుల్లో తరగతులు నిర్వహిస్తే యాజమాన్యాలపై శాఖాపరమైన చర్యలు తీసుకుంటామని విద్యాశాఖ అధికారులు హెచ్చరించారు.