సంగారెడ్డి, జూలై 10(నమస్తే తెలంగాణ) : వానకాలం ప్రారంభమై నెలరోజులు పూర్తయినా రైతులు మొగులుకేసి చూడడం తప్పడం లేదు. ఇప్పటి వరకు భారీ వర్షాలు కురవ పోవడంతో రైతులు ఆందోళన చెందుతున్నారు. సంగారెడ్డి జిల్లా లో వానకాలం ఆరంభంలో వర్షాలు కురియడంతో రైతులు సంబురపడి పంటల సాగు మొదలుపెట్టారు. ఆ తర్వాత క్రమంగా వర్షాలు ముఖం చాటేశాయి. దీంతో ఆశించిన స్థాయిలో వానకాలం సాగు సాగడం లేదు. జిల్లా అంతటా ఇప్పటి వరకు 60 శాతం మాత్రమే పంటలు వేశారు. విత్తనాలు విత్తుకునేందుకు మరోవారం రోజులు గడువు ఉంది.
ఈనెల 15వరకు విత్తునాలు విత్తుకునేందుకు సమయం ఉందని వ్యవసాయశాఖ అధికారులు చెబుతున్నారు. వారం, పది రోజుల్లో భారీ వర్షాలు కురియకపోతే వానకాలం పంటల సాగు గతేడాది కంటే తగ్గే అవకాశాలు ఉన్నాయి. గతేడాది వానకాలంలో సంగారెడ్డి జిల్లాలో 7.50 లక్షల ఎకరాలకుపైగా పంట లు సాగయ్యాయి. ఈ ఏడాది 7,24,405 లక్షల ఎకరాల్లో పంటలు సాగవుతాయని వ్యవసాయశాఖ అధికారులు అంచనా వేశారు. ఇప్పటి వరకు 4.33 లక్షల ఎకరాల్లో మాత్రమే పంటలు వేశారు. ఇదే పరిస్థితి ఉంటే పంటల సాగు విస్తీర్ణం తగ్గే అవకాశాలు ఉన్నాయి.
సంగారెడ్డి జిల్లాలో పక్షం రోజులుగా వర్షాల జాడలేదు. అడపాదడపా అక్కడక్కడా చిరుజల్లులు మాత్రమే కురుస్తున్నాయి. దీంతో పంటల సాగుపై ప్రభావం పడుతున్నది. వానకాలం ప్రారంభమైన జూన్ నెల నుంచి ఇప్పటి వరకు జిల్లాలో 167.8 మిల్లీమీటర్ల వర్షం కురవాల్సి ఉండ గా.. 148.8 వర్షం కురిసింది. జిల్లాలో కేవలం 60శాతం పంటలు మాత్రమే వేశారు. పత్తి, పెసర,మినుము, కంది పంటలు ఆశించిన మేర వేయలేదు. వర్షాలు కురియక పోతే పత్తి, కంది, వరి పంటల సాగు విస్తీర్ణం తగ్గే అవకాశాలు ఉన్నాయి.
4 లక్షల ఎకరాలకుపైగా పత్తి సాగవుతుందని ఆశించగా, ఇప్పటి వరకు 3 లక్షల ఎకరాల్లో మాత్రమే సాగు అయ్యింది. 43వేల ఎకరాల్లో కంది, 7146 ఎకరాల్లో పెసర, 4512 ఎకరాల్లో మినుము, 41,813 ఎకరాల్లో సోయాబీన్, 3602 ఎకరాల్లో మొక్కజొన్న, 7615 ఎకరాల్లో చెరుకు పంటలు రైతులు వేశా రు. వరి సాగు కోసం రైతులు నారుమడులు సిద్ధ్దం చేసుకున్నారు. త్వరలో వరినాట్లు ప్రారం భం కానున్నాయి. రాబోయే వారం రోజులు కీలకం కానున్నది. ఆ సమయంలో భారీ వర్షాలు కురిస్తే పంటల సాగు విస్తీర్ణం పెరిగే అవకాశం ఉంటుంది. లేనిపక్షంలో గడ్డుకాలం తప్పదు.